Қоғамның тыныс-тіршілігі көбіне көзге көрінбейтін, бірақ күн сайынғы еңбегімен елге үлес қосып жүрген қарапайым жандардың табанды қызметіне сүйенеді. Сол жандардың бірі – Шымкент қаласындағы «TTK» ЖШС компаниясында 74 бағытта жолаушылар тасымалын жүзеге асырып келе жатқан тәжірибелі жүргізуші Диханов Қанат.
1973 жылы Қазығұрт ауданы, Қызыл Ата ауылында дүниеге келген Қанат жастайынан еңбекқорлық пен тәртіпті бойына сіңіріп өсті. Мектепті аяқтаған соң кәсіби-техникалық білім алып, 1991–1993 жылдары Отан алдындағы әскери борышын абыроймен өтеді. Әскерден кейін қоғамдық көлік саласын таңдауы кездейсоқ емес еді. Ол өз өмірін халыққа қызмет етумен байланыстыруды дұрыс деп шешіп, 1994 жылдан бастап транспорт саласында үздіксіз еңбек етіп келеді.
Жолаушылар тасымалы – жай ғана рөлге отырумен шектелмейтін, үлкен жауапкершілікті талап ететін жұмыс. Күн сайын жүздеген адамды қауіпсіз жеткізу, олардың уақытын, жайлылығын, көңіл-күйін қамтамасыз ету – бұл мамандықтың басты міндеті. Қанат мырза осы міндеттерді адалдықпен, кәсібилікпен әрі үлкен жауапкершілікпен атқарып келеді.
Жалпы еңбек өтілі – 31 жыл. Оның ішінде «TTK» ЖШС компаниясында 18 жыл бойы бір бағытта үздік жүргізуші ретінде қызмет етуі – кәсіби тұрақтылық пен шеберліктің айғағы. Қала жолдарын жетік меңгерген Қанат кез келген жағдайда қауіпсіз басқаруды бірінші орынға қояды. Жолаушылар тарапынан жылы пікірлер мен алғыстардың жиі айтылуы – оның еңбегінің шынайы бағасы.
Қанат Диханов үшін автобус – тек табыс көзі ғана емес, адамдармен байланыс орнататын, қоғамға пайда әкелетін қызмет алаңы. Ол әр жолаушыны сыпайылықпен қарсы алып, жол бойына мәдениеттілік пен адамгершілікті серік етеді. Жас жүргізушілерге бағыт-бағдар беріп, тәжірибесімен бөлісуі де оның кәсіби деңгейінің жоғары екендігін көрсетеді.
Отбасында да ол – жауапты азамат, сүйікті жар және мейірімді әке. Жұбайы Саутова Гүлсарамен бірге алты бала тәрбиелеп отырған үлкен шаңырақтың тірегі. Балаларына еңбекқорлық, әдептілік және отансүйгіштік қасиеттерін үйретуді басты міндет санайды.
Өмір бойы ұстанып келе жатқан қағидасы да осы құндылықтармен сабақтас:
«Адал еңбек – адамдықтың белгісі. Отбасыға сүйіспеншілік және қоғамға пайда тигізу – ең басты мақсатым».
Қанат мырза қоғамдық көліктің уақытылы жүруі мен халықтың қауіпсіздігіне үлес қосып қана қоймай, қаланың қалыпты тіршілігінің үзілмеуіне өз еңбегімен жағдай жасап келеді. Оның жұмысы көзге көп түспегенімен, қала өмірі үшін аса маңызды. Жолаушылар күн сайын мектепке, жұмысқа, сырқатханаға немесе үйіне аман-есен жетуі – дәл осындай мамандардың еңбегінің нәтижесі.
Дәл осындай азаматтар – елдің беймәлім қаһармандары. Олардың еңбегі қаламызды қозғалыста ұстап, өмірімізді жеңілдетеді, болашағымызға сенім сыйлайды. Еңбектің қадірін түсінетін, міндетіне адал Қанат Диханов сынды жандар барда қоғамның тірегі мықты болып қала беретіні анық.
