Алматы қаласы тоғызқұмалақ спорт түрінің астанасы болып бекітілді. Жергілікті атқарушы органдар ІІ Жасөспірімдер арасындағы тоғызқұмалақтан Әлем чемпионатына қарқынды дайындық жүргізіп жатыр. Биыл жарыспен қоса, туризмді дамытуға да басымдық беріліп отыр. Келген делегациялар шаһардағы туристік орталықтарды аралайды деп көзделген. Бұл туралы ҚР Тоғызқұмалақ спорт федерациясының президенті Әкім Тұрсұн ОКҚ алаңында өткен баспасөз мәслихатында айтты, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
Оның хабарлауынша, отандық медициналық туризмді насихаттауға да ерекше назар аударылады.
«Алматы қаласындағы бірнеше медициналық орталық осы шараға қатысу жайында ұсыныстарын білдірді. Бізде де арзан, тиімді және өте жоғары сапалы медициналық көмек көрсетілетінін паш еткіміз келеді», – деді спикер.
Айта кетерлігі, биылғы чемпионатқа 140 шетелдік спортшы келеді деген жоспар бар. Қазақстан намысын 60-қа жуық адам қорғайды. Қазір әлем мемлекеттері тарапынан тоғызқұмалақ ойнауға қызығушылық артып келеді. Әсіресе, Пәкістан, Мексика, Румыния, Оңтүстік Корея елдері арасында сұраныс жоғары. Мәселен, Исламабад қаласында екі ел бірлесіп спорт кешенін салып жатыр, Сол жерде қазақ күресі, тоғызқұмалық сынды спорт түрлері дамытылады.
