Шымкент қаласында шағын және орта бизнесті дамытуға бағытталған нақты қадамдар жүйелі түрде жүзеге асырылып келеді. Соның айқын дәлелі – кәсіпкерлерге арналған жаңа өндірістік инфрақұрылым қалыптастыру жобалары. Қазіргі таңда қала аумағында жалпы көлемі 45 мың шаршы метрді құрайтын үш бірдей шағын өндірістік алаңның құрылысы аяқталу сатысында тұр. Бұл бастама жаңа бизнес жобаларды іске қосуға, өндірісті кеңейтуге және кәсіпкерлер үшін дайын инфрақұрылымы бар алаң ұсынуға бағытталған.
Аталған өндірістік алаңдарда 50-ден астам шағын кәсіпорын ашу жоспарланып отыр. Нәтижесінде 300-ден аса қала тұрғыны тұрақты жұмыспен қамтылатын болады. Бұл тек жаңа жұмыс орындарын құрумен шектелмей, жергілікті өндірістің дамуына, ішкі нарықты отандық өніммен қамтуға және қаланың экономикалық белсенділігін арттыруға тікелей әсер етеді. Шағын өндірістік алаңдардың басты артықшылығы – кәсіпкерлерге инженерлік желілермен, жол, электр, су және басқа да қажетті инфрақұрылыммен қамтамасыз етілген дайын аумақтың ұсынылуы.
Шымкент қаласының әкімі Ғабит Сыздықбеков кәсіпкерлікті қолдау бағытында атқарылып жатқан жұмыстардың нәтижесіне ерекше тоқталды. Оның айтуынша, өткен жылдан бастап бизнесті ашық әрі адал салық төлеуге ынталандыру мақсатында бөлшек салық мөлшері 4 пайыздан 2 пайызға дейін төмендетілген. Бұл шешім кәсіпкерлер үшін айтарлықтай жеңілдік болып, көлеңкелі экономиканы азайтуға мүмкіндік берді. Соның нәтижесінде аталмыш салық түрінен бюджетке түсетін түсімдер 9 млрд теңгеден 31 млрд теңгеге дейін өсіп, үш есеге артқан.
Қала әкімінің мәлімдеуінше, жаңа Салық кодексіне байланысты бұл шешім қайта қаралып, келесі жылдан бастап салықтық жеңілдікті пайдаланатын кәсіпкерлер саны айтарлықтай кеңейеді. Егер бұрын бұл мүмкіндік 8 мың кәсіпкерге ғана қолжетімді болса, алдағы уақытта жеңілдікті қолданушылар саны 102 мыңға дейін жетпек. Бұл бизнесті тіркеуге, өндірісті заңды түрде жүргізуге және салықтық тәртіпті нығайтуға оң әсерін тигізеді.
Жалпы, мемлекеттік қолдау шараларының нәтижесінде соңғы үш жылда Шымкент қаласында белсенді жұмыс істейтін шағын және орта кәсіпкерлік субъектілерінің саны 128 мыңнан 141 мыңға дейін артты. Ал осы салада жұмыспен қамтылған азаматтар саны 250 мыңнан асып отыр. Қала экономикасындағы шағын және орта кәсіпкерлікпен өндірілген өнімнің үлесі де айтарлықтай өскен. Егер бұрын бұл көрсеткіш 41 пайызды құраса, бүгінде 58 пайызға жеткен.
Биыл кәсіпкерлікті мемлекеттік қолдау шараларына 20 млрд теңге қаралып, 1 971 жобаға қаржылай және өзге де қолдау көрсетілген. Бұл – Шымкенттің кәсіпкерлікке қолайлы қала ретінде қалыптасып келе жатқанын көрсететін маңызды көрсеткіш. Инфрақұрылыммен қамтылған жаңа өндірістік алаңдар, салықтық жеңілдіктер мен қаржылай қолдау шаралары алдағы уақытта да қала экономикасының тұрақты дамуына негіз болмақ.
