Қазір қаладағы Президент резиденциясын балаларға арналған сауықтыру лагеріне айналдыру жұмыстары жүріп жатыр. Нысан білім басқармасының балансына беріліп, қажетті жиһазбен қамтылуда.
«Білім беру саласын цифрландыру аясында бірқатар жаңа жоба қолға алынды. Барлық мектептің бейнебақылау жүйелері полиция департаменттерінің жедел басқару орталығына қосылған заманауи интеллектуалды жүйе «Айқын» жобасы жүзеге асуда. Ол мектептегі қауіпсіздік, өрт және буллинг жағдайларымен бірге контингенттің оқу процесіне қатысуын бақылайды. Мектептердегі тегін тамақтандыруды бақылайтын «Әлеуметтік әмиян» цифрлық жүйесі енгізіліп, 2 айда 460 млн теңге бюджет қаражаты үнемделді. Қосымша білім беру бойынша шығармашылық және спорттық үйірмелерге «бір бала – бір орын» қағидатымен ваучерлік жүйе іске қосылды», – деді қала басшысы.
Жыл басынан бері қала спортшылары Қазақстан, Азия және әлем чемпионаттарына қатысып, 827 алтын, 753 күміс және 793 қола медаль жеңіп алды. «Шымкент мұнай зауыты» 2 модульді спорт кешенін пайдалануға берді. «Қазақстан халқына» қоры арқылы 2 модульді спорт кешені салынуда. Орталық стадионы демеушілердің қаражатынан халықаралық стандартқа сай жаңартылды және 3 ашық мұз айдыны салынды. 35 мың орындық стадионның құрылысы жүріп жатыр.
Соңғы 3 жылда шаһарда жаңадан 14 медициналық мекеме ашылып, емханалардың орташа жүктемесі 25 мың адамнан 21 мыңға дейін азайды. Медициналық ақпаратты автоматты түрде талдап, қатерлі ісіктерді, өкпе ауруларын, жүрек-тамыр патологияларын ерте анықтайтын PACS SYSTEMS жасанды интеллект ақпараттық жүйесі енгізілді. Жоғары технологиялардың көмегімен 1102 операция жасалды. Жергілікті бюджеттен 2 аурухана күрделі жөндеуден өтті. Жедел жәрдем қызметіне 40 арнайы автокөлік алынды.
