Шымкент қаласында жұмыссыз азаматтарды еңбек нарығына бейімдеу және жаңа мамандықтарға оқыту бағытындағы мемлекеттік бастама қарқынды жүзеге асып жатыр. Бұл бағдарлама — тұрғындарға кәсіби дағды қалыптастырумен қатар, тұрақты табысқа жол ашудың тиімді құралына айналған.
Бүгінде мегаполис бойынша 760 азамат кәсіптік оқуға жолданған. Оның ішінде 600-і қаладағы оқу орталықтарында теориялық білім алса, тағы 160 адам түрлі кәсіпорындардың өндірістік базасында тәжірибеден өтуде. Бұл тәсіл оқу мен тәжірибені ұштастырып, еңбек нарығына тікелей бейімделуге мүмкіндік береді.
Бағдарлама қатысушыларына мемлекет тарапынан әлеуметтік қолдау шаралары да қарастырылған. Білім беру ұйымдарында оқитын азаматтарға ай сайын 43 574 теңге көлемінде шәкіртақы төленсе, өндірістік тәжірибеден өтушілерге 78 640 теңге мөлшерінде төлем жүргізіледі. Бұл жұмыссыздарға оқып жүріп те табыс табуға мүмкіндік береді.
Кәсіптік оқыту курстарының басты мақсаты – еңбек нарығындағы сұранысқа ие мамандарды даярлау. Осы бағытта Alisha оқу орталығында 25 жұмыссыз қыз-келіншек кәсіби білім алып жатыр. Олардың 20-сы – «кестелеуші», ал 5-еуі – «тігінші» мамандығын игеруде. Қатысушылар заманауи құрал-жабдықтармен жұмыс істеуді үйреніп, тігін және сәндік қолданбалы өнер саласында алғашқы қадамдарын жасап келеді.
Оқу курстары аяқталған соң тыңдаушыларға мемлекеттік үлгідегі сертификат табысталады. Бұл құжат түлектерге өз мамандығы бойынша жұмысқа орналасуға немесе жеке кәсібін ашуға мүмкіндік береді. Сонымен қатар, түлектер «Enbek.kz» электрондық еңбек биржасы және аудандық мансап орталықтары арқылы бос жұмыс орындарымен қамтамасыз етіледі.
Мамандардың айтуынша, мұндай курстарға қатысу — тек жаңа кәсіпті меңгеру ғана емес, сонымен бірге өмір сапасын жақсартудың нақты жолы. Жаңа дағды мен білім алған азаматтар өз қабілеттеріне сенімді бола түсіп, тұрақты табыс көзін табуға мүмкіндік алады.
Қалалық жұмыспен қамту орталығының мәліметінше, кәсіптік оқуға қатысушылардың басым бөлігі – әйелдер мен жастар. Бағдарлама олардың экономикалық белсенділігін арттырып, өз кәсібін бастауға ынталандырып отыр.
Шымкент қаласында жүзеге асып жатқан бұл бастама – еңбек нарығын білікті кадрлармен қамтамасыз етуге және тұрғындардың әлеуметтік тұрақтылығын нығайтуға бағытталған маңызды қадам. Кәсіптік оқыту арқылы жаңа мамандық иелерінің көбеюі – қаланың экономикалық және әлеуметтік дамуына серпін берері сөзсіз.
