Оның айтуынша, ата-аналар комитеттерінің қызметі де трансформациялана бастады. Ата-аналар комитеттері мектептің, ұстаздардың сенімді серіктесі ретінде тәрбие жұмысына белсенді араласып, ұрпақ тәрбиесіне қатысты жауапкершілікті бөліседі. Ата-аналарды педагогикалық қолдау орталықтарының жұмысы одан әрі жандандырылып, мектеп – бала – ата-ана үштігінің ынтымағын нығайтуға ерекше назар аударылады.
«Мүдделі мемлекеттік органдардың бала тәрбиесіне қатысты бастамалары бағдарламаға кіріктірілді. 14 орталық мемлекеттік органмен бірлескен жоспар әзірленді. Бұл қадам тәрбие жұмысын біріздендіруге, әрі тиімділігін арттыруға септігін тигізеді. Мысалы, құқық қорғау органдары, медицина ұйымдары мамандарымен бірлескен шаралар жүйелі ұйымдастырылуда», – деді спикер.
Бағдарлама мазмұнына сәйкес бірыңғай дизайн код әзірленді. Арнайы брендбукқа сәйкес мектептің ішкі безендірілуі қолға алынды. Бұл білім ортасын үшінші ұстаз ретінде қолдануға мүмкіндік береді.
Бағдарламаның 6 құндылығын айшықтайтын безендіру үлгісі әзірленді. Безендіру барысында күнделікті дағдыларды, жақсы әдеттерді қалыптастыратын суреттер мен сөздер қолданылады. Пән кабинеттері жас ерекшеліктеріне және пәннің бағыт-бағдарына байланысты безендіріледі. Қазақстанның көрікті табиғи, тарихи орындарының суреттері қолданылады. Әлемдік деңгейдегі тарихи тұлғалар, ойшылдардың бейнелері мен сөздері қолданылады.
Брендбук динамикалық құжат, әр мектеп өз ерекшелігіне, сыйымдылығына қарай безендіруде үлгілерді дербес таңдайды.
Бұл бірыңғай дизайн-кодты кезең-кезеңімен енгізу көзделген. Алдымен, құрылысы жүріп жатқан білім беру ұйымдарында қолданылады. Екінші кезекте, реновация жүргізілетін 1300 мектептің қабырғасында, үшінші кезеңде, күрделі және ағымдағы жөндеу жұмыстары аясында барлық мектептерде қолдану ұсынылған.
