Сауд Арабиясына жұмыс сапары аясында Қазақстан Республикасы Сыртқы істер министрінің орынбасары Арман Исағалиев Корольдіктің Сыртқы істер министрінің бірінші орынбасары Уалид Әл-Хурейджимен кездесті, деп хабарлайды No-comment.kz - ҚР Сыртқы істер министрлігіне сілтеме жасап.
Келіссөздер барысында А.Исағалиев Қазақстан Республикасының Президенті Қ.Тоқаевтың Сауд Арабиясының Тақ мұрагері, Премьер-министрі Мұхаммед бен Салман Әл Саудқа жолдауын табыстады. Жолдауда Корольдіктің басшылығы мен халқына тілектестік білдіріліп, Сауд Арабиясы азаматтарының қауіпсіздігін қамтамасыз ету және азаматтық инфрақұрылымды қорғау жөніндегі күш-жігеріне қолдау көрсетілген.
Сауд тарапы Қазақстанның бұл ізгі ниетін жоғары бағалап, көрсетілген қолдау үшін ризашылығын білдірді, сондай-ақ екі ел арасындағы берік достық пен өзара сенім байланыстарын атап өтті.
Тараптар өңірдегі ахуал жөнінде пікір алмасып, Қазақстан - Сауд Арабиясы қатынастарының өзекті мәселелерін және екі елдің сыртқы саяси ведомстволары арасындағы байланыстарды одан әрі нығайту перспективаларын талқылады.
Кездесу қорытындысы бойынша екі елдің өкілдері Қазақстан - Сауд Арабиясы әріптестігін одан әрі тереңдету мақсатында тұрақты саяси диалогты жалғастырудың және күш-жігерді үйлестірудің маңыздылығын атап өтті.
