Шымкент қаласында «WorldSkills Shymkent – 2026» өңірлік кәсіби шеберлік чемпионатының жеңімпаздарын марапаттау рәсімі өтті. Дәстүрлі байқау еңбек нарығына қажетті білікті кадрларды анықтап, олардың кәсіби шеберлігін шыңдауға және жұмысшы мамандықтарының беделін көтеруге бағытталған маңызды алаңға айналды.
Салтанатты рәсімге білім беру ұйымдарының өкілдері, жұмыс берушілер, әлеуметтік серіктестер мен жастар қатысты. Олардың қатарында Шымкент қалалық Кәсіпкерлер палатасының директоры Сабира Адамбекова да болды. Ол өз сөзінде WorldSkills чемпионаты тек кәсіби жарыс емес, өндіріс пен білім беру арасындағы байланысты нығайтатын, жастардың еңбекке деген қызығушылығын арттыратын тиімді жоба екенін атап өтті.
Сабира Адамбекованың айтуынша, қазіргі еңбек нарығында технологияны меңгерген, кәсіби дағдысы жоғары және өз ісіне жауапкершілікпен қарайтын мамандарға сұраныс тұрақты өсіп келеді. Сондықтан мұндай чемпионаттар жастардың қабілетін ашып қана қоймай, олардың болашақта тұрақты жұмысқа орналасуына және кәсіби тұрғыдан дамуына мүмкіндік береді.
Биылғы өңірлік чемпионатқа 258 үміткер қатысып, әртүрлі құзыреттер бойынша өз білімдері мен тәжірибелерін сынға салды. Қатысушылар өндіріс, құрылыс, қызмет көрсету, цифрлық технологиялар және басқа да салалардағы кәсіби дағдыларын көрсетіп, үздіктер анықталды. Чемпионат қорытындысы бойынша жеңімпаздар арнайы марапатталып, Кәсіпкерлер палатасының атынан сыйлықтар табысталды.
WorldSkills қозғалысының басты мақсаты – техникалық және кәсіптік білім беру жүйесінің мүмкіндіктерін кеңінен насихаттау, жұмысшы мамандықтарының қоғамдағы беделін арттыру және өндіріс орындарына қажетті білікті кадрларды даярлау. Бұл бағыттағы жұмыстар жұмыс берушілердің сұранысына сәйкес мамандарды даярлауға және білім беру бағдарламаларын жетілдіруге мүмкіндік береді.
Мамандардың пікірінше, кәсіпкерлердің осындай бастамаларға белсенді қатысуы білім беру ұйымдары мен өндіріс арасындағы байланысты күшейтеді. Нәтижесінде еңбек нарығының талаптарына бейімделген, тәжірибесі бар жас мамандардың саны артып, кәсіпорындардың кадрлық әлеуеті нығая түседі.
Сонымен қатар, кәсіби шеберлік чемпионаттары жастарды жұмысшы мамандықтарын таңдауға ынталандырып, еңбек адамының мәртебесін көтеруге ықпал етеді. Бұл өңірдегі кәсіпкерліктің, өндіріс пен қызмет көрсету саласының тұрақты дамуына оң әсерін тигізеді.
«WorldSkills Shymkent – 2026» чемпионаты кәсіби білім беру сапасын арттыруға, жастардың әлеуетін дамытуға және еңбек нарығына сұранысқа ие мамандарды даярлауға бағытталған маңызды жоба ретінде өз маңызын тағы бір мәрте дәлелдеді.
