Премьер-министрдің орынбасары Қанат Бозымбаев әлеуметтік-кәсіпкерлік корпорацияларды (ӘКК) трансформациялау мәселелері бойынша кеңес өткізді, деп хабарлайды No-comment.kz - ҚР Премьер-Министрінің ресми ақпараттық ресурсына сілтеме жасап.
ӘКК-лерді толыққанды өңірлік даму институттарына айналдыру Мемлекет басшысының тапсырмасын орындау аясында жүзеге асырылуда.
ӘКК қызметін жетілдіру жөніндегі ұсыныстарды салалық министрліктер, өңір әкімдіктері және корпорациялардың өздері ұсынды.
Ұлттық экономика министрлігі ӘКК қызметінің 7 негізгі функциясын айқындады. Осы функциялар шеңберінде ӘКК өңірлік жобалардың бес жылдық портфельдерін қалыптастырып, әрбір жоба бойынша инвесторлар мен кредиторларды айқындауы тиіс. Қаржыландыру көздері ретінде банктер мен «Бәйтерек» тобының даму институттары қарастырылуда.
ӘКК бизнес пен ұлттық даму институттары («Даму» қоры, ӨДҚ, ҚДБ, Аграрлық кредиттік корпорация, KazakhInvest, QazIndustry, QazTrade) арасындағы байланыстырушы буын ретінде әрекет етеді, сондай-ақ оларға табыстылық және өзін-өзі ақтау қағидаттары негізінде кредит беру құқығы беріледі. Мемлекеттік активтерді басқару табыс табуға бағдарлануы тиіс.
Реформа аясында тұрақтандыру қорларын ӘКК құрылымынан шығару мәселесі қарастырылуда. Бұл тиімсіз функцияларды жоюға, ашықтықты арттыруға және кредиттік рейтингтер алу мен нарықтық қаржыландыру тартуға жағдай жасауға мүмкіндік береді.
Кеңес қорытындысы бойынша Қанат Бозымбаев арнайы экономикалық және индустриялық аймақтардың жұмыс істеу мәселелерін пысықтауды, бейінді емес активтерге түгендеу жүргізуді, сондай-ақ ӘКК үшін бірыңғай кредиттік және инвестициялық саясатты қалыптастыруға арналған нормативтік базаны әзірлеуді тапсырды.
