Түркістан облысында ауыл шаруашылығы саласын жаңғырту, өндірілген өнімді терең өңдеу арқылы қосылған құны жоғары тауар шығару және өңірдің әлеуметтік-экономикалық дамуын жеделдету бағытындағы жүйелі жұмыстар жалғасуда. Осы мақсатта Түркістанға ҚР Парламенті Сенатының Аграрлық мәселелер, табиғатты пайдалану және ауылдық аумақтарды дамыту комитетінің іссапары ұйымдастырылып, өңірде жүзеге асырылып жатқан ірі агроөнеркәсіптік жобалардың қазіргі ахуалы мен болашағы жан-жақты қаралды.
Іссапар аясында комитет мүшелері «SPK Turkistan» өндірістік паркі мен «Түркістан» индустриялық аймағында болып, ауыл шаруашылығы өнімдерін сақтау, өңдеу және инфрақұрылыммен қамтамасыз ету бағытында атқарылып жатқан жұмыстармен танысты. Делегация көкөніс сақтау қоймаларының жұмысын, сондай-ақ су ресурстарын тиімді пайдалануға бағытталған жаңбырлатып және тамшылатып суару жүйелерін шығаратын өндіріс орындарын аралады. Атап айтқанда, «BNK Group» серіктестігінің және «Тұран су» мемлекеттік кәсіпорнының заманауи су үнемдеу технологияларына негізделген өнімдері өңірдегі аграрлық саясаттың экологиялық және экономикалық тиімділігін айқындай түседі.
Сапардың маңызды бөлігі Түркістан қаласындағы Достық үйінде өткен көшпелі отырыс болды. Онда ауыл шаруашылығы саласын әртараптандыру, өнімдерді терең өңдеу, өндірістік кластерлерді дамыту және жасыл экономика қағидаттарын енгізу мәселелері талқыланды. Жиынға Сенат комитетінің төрағасы Әли Бектаев, ҚР Ауыл шаруашылығы вице-министрі Ербол Тасжүреков, Түркістан облысы әкімінің орынбасары Нұрбол Тұрашбеков, облыстық мәслихат пен салалық басқарма өкілдері, кәсіпкерлер палатасының басшылығы қатысты.
Кездесу барысында еліміздің агроөнеркәсіптік кешенін жаңа сапалық деңгейге көтеру үшін өңірлердегі өңдеу өнеркәсібін күшейту аса маңызды екені айтылды. ҚР Ауыл шаруашылығы вице-министрі Ербол Тасжүреков Түркістан облысында жүзеге асырылатын жаңа өндірістік жобаларға тоқталып, 2026 жылы жылдық қуаттылығы 150 мың тонна жүгеріні терең өңдейтін «Казкрахмал» зауыты іске қосылатынын атап өтті. Бұл кәсіпорын крахмал өнімдерін өндіруге бағытталып, жүздеген жаңа жұмыс орнын ашуға мүмкіндік береді. Аталған жоба ауыл шаруашылығы шикізатын дайын өнімге айналдыру арқылы өңір экономикасының тұрақтылығын арттыруға бағытталған.
Өңірдің аграрлық әлеуетіне тоқталған облыс әкімінің орынбасары Нұрбол Тұрашбеков Түркістан облысының республикадағы орны ерекше екенін жеткізді. Облыс жыл сайын еліміздің жалпы ауыл шаруашылығы өнімінің шамамен 13 пайызын өндіреді. Биылғы жылдың он айында өндірілген өнім көлемі 1 трлн теңгеден асты. Сонымен қатар егіс алқаптарының құрылымы да кеңейіп, ауыл шаруашылығы дақылдарының жалпы көлемі 907 мың гектарға жетті. Бұл көрсеткіш өңірде аграрлық өндірістің тұрақты дамып келе жатқанын көрсетеді.
Түркістан облысы бірқатар негізгі ауыл шаруашылығы өнімдері бойынша республикада жетекші орын алады. Елде өндірілетін мақтаның барлығы дерлік, жүзімнің басым бөлігі, бақша және көкөніс өнімдерінің едәуір үлесі осы өңірге тиесілі. Мал шаруашылығы саласында да облыстың үлесі жоғары. Бұл көрсеткіштер Түркістанды тек шикізат өндіруші аймақ қана емес, сонымен қатар қайта өңдеу мен тоқыма өнеркәсібін дамытуға қолайлы орталық ретінде сипаттайды.
Су ресурстарын қорғау және экологияны сақтау мәселелері де жиында назардан тыс қалмады. Өңірде су үнемдеу технологияларын енгізу белсенді түрде жүргізіліп келеді. Жоспарланған көрсеткіштерден асып түсуі бұл бағыттағы жұмыстың тиімділігін дәлелдейді. Тамшылатып және жаңбырлатып суару әдістері суды үнемдеумен қатар, өнімділікті арттыруға және табиғи ресурстарға түсетін жүктемені азайтуға мүмкіндік беріп отыр. Бұл – жасыл экономика қағидаттарына сай келетін маңызды қадам.
Сонымен қатар ауыл шаруашылығын тек шикізат өндірумен шектемей, дайын өнім шығаруға көшіру мақсатында өңірде кластерлік жобалар іске асырылуда. Әсіресе мақта-тоқыма кластерін қалыптастыруға басымдық берілген. Бұл бағыттағы жобалар экспортқа тәуелділікті азайтып, ішкі нарықты отандық өніммен қамтуға және жаңа жұмыс орындарын ашуға ықпал етеді.
Жалпы алғанда, Түркістан облысында ауыл шаруашылығы өнімдерін терең өңдеу, су ресурстарын тиімді пайдалану, экологияны қорғау және өндірісті әртараптандыру бағытындағы жұмыстар өңірдің әлеуметтік-экономикалық дамуына серпін беріп отыр. Бұл бастамалар «Таза Қазақстан» экологиялық қағидаттарымен үндесіп, табиғатты сақтау мен экономикалық өсімді қатар қамтамасыз етуге бағытталған жүйелі саясаттың нәтижесі болып табылады.
