Түлкібас ауданы – Түркістан облысындағы табиғи әлеуеті жоғары, туризмді дамытуға қолайлы өңірлердің бірі. Тау бөктеріндегі көркем ландшафт, өзен-көлдері мен мөлдір бастаулары, қалың орманды алқаптары бұл аймақты ерекше тартымды етеді. Табиғатының әсемдігі үшін Түлкібас өңірін жергілікті тұрғындар ғана емес, сырттан келген қонақтар да жиі «екінші Швейцария» деп атайды. Соңғы жылдары ауданның туристік мүмкіндіктері жүйелі түрде зерттеліп, жаңа жобалар арқылы дамытуға басымдық беріліп келеді.
Осы бағыттағы жұмыстардың нақты көрінісі ретінде Түркістан қаласында өткен «Turkistan International Investment and Tourism» халықаралық форумы аясында өңір туризмін дамытуға қатысты бірқатар маңызды бастамалар мақұлданды. Форум аясында шетелдік инвесторлармен келіссөздер жүргізіліп, туризм саласына инвестиция тарту мәселелері кеңінен талқыланды. Соның нәтижесінде «Kazakhstan Silk Road International Holdings Group» жауапкершілігі шектеулі серіктестігінің президенті Чан Минг бастаған шетелдік бизнес делегация Түлкібас ауданына арнайы іссапармен келіп, өңірдің туристік әлеуетімен жан-жақты танысты.
Іссапар барысында делегация мүшелеріне ауданның табиғи ерекшеліктері, қолайлы климаттық жағдайы және туризмді дамытуға арналған инфрақұрылымдық мүмкіндіктері таныстырылды. Инвесторлар алдымен Иірсу елді мекенінің маңында орналасқан аумақты аралап көрді. Бұл жерде жаңа туристік аймақ құру жобасы қарастырылып отыр. Жоба аясында табиғи ландшафтты сақтай отырып, туристерге арналған демалыс орындарын, жаяу серуендеуге және экотуризмге бағытталған инфрақұрылым қалыптастыру жоспарлануда. Мұндай бастамалар өңірге келетін туристер санын арттырып, жергілікті тұрғындар үшін жаңа жұмыс орындарын ашуға мүмкіндік береді.
Сонымен қатар шетелдік делегация Ақсу шатқалында көру алаңшасын салу жобасымен танысты. Ақсу шатқалы – өзінің биік жартастары мен ерекше табиғи көрінісімен танымал орындардың бірі. Көру алаңшасын салу арқылы туристерге шатқалдың әсем көрінісін қауіпсіз әрі қолайлы жағдайда тамашалауға мүмкіндік тумақ. Бұл жоба ішкі және сыртқы туризмді дамытуға тың серпін беріп, өңірдің туристік брендіне айналуы мүмкін.
Аралау барысында қонақ үйлер салу, этноауыл кешенін дамыту және туристерді тартуға бағытталған өзге де нысандарды тұрғызу жоспарлары да таныстырылды. Этноауыл жобасы арқылы қазақ халқының салт-дәстүрін, ұлттық тағамдарын, қолөнерін және тұрмыс-тіршілігін туристерге кеңінен көрсету көзделіп отыр. Мұндай кешендер мәдени туризмді дамытуға, ұлттық құндылықтарды дәріптеуге және өңірдің өзіндік ерекшелігін сақтауға мүмкіндік береді.
Шетелдік инвесторлар сондай-ақ Түлкібас ауданындағы өндірістік әлеуетпен де танысты. Делегация «Beibars-Bottlers» зауытына барып, кәсіпорынның өнім түрлерін көрді. Зауытта шығарылатын өнімдердің сапасына оң баға беріп, өндірістің ұйымдастырылу деңгейін жоғары бағалады. Бұл өз кезегінде өңірде туризммен қатар, өңдеу өнеркәсібін де қатар дамытуға мүмкіндік бар екенін көрсетті.
Сапар «Ақсу-Жабағылы» мемлекеттік табиғи қорығының музейінде жалғасын тапты. Делегация мүшелері қорықтың бай флорасы мен фаунасы, тарихи-танымдық маңызы туралы ақпарат алып, экотуризмді дамыту мүмкіндіктеріне ерекше қызығушылық танытты. Ақсу-Жабағылы – Орталық Азиядағы ең көне қорықтардың бірі, сондықтан бұл нысан халықаралық деңгейде туристерді тартуға әлеуеті зор аймақ саналады.
Жалпы алғанда, шетелдік бизнес делегацияның Түлкібас ауданына сапары өңір туризмін дамытуға бағытталған нақты қадамдардың бірі болды. Алдағы уақытта ұсынылған жобалар жан-жақты пысықталып, кезең-кезеңімен жүзеге асырылатын болады. Бұл бастамалар аудан экономикасын әртараптандырып, туристік инфрақұрылымды жақсартуға, жаңа инвестициялар тартуға және Түлкібастың туристік беделін халықаралық деңгейде арттыруға жол ашады.
