Түркістан облысының Түлкібас ауданында халықты жұмыспен қамту мен жастарды еңбекке тарту бағытында маңызды шара ұйымдастырылды. Аудандық Мәдениет үйінде өткен бос жұмыс орындары жәрмеңкесін «Мансап орталығы» ұйымдастырды. Шараның басты мақсаты – жұмыссыздықты азайту, тұрғындарға жаңа жұмыс мүмкіндіктерін ұсыну және еңбек нарығындағы белсенділікті арттыру.
Жәрмеңке аясында ауданның түрлі саладағы мекемелері мен кәсіпорындары өз ұсыныстарын ұсынып, тұрғындарға 100-ден астам бос жұмыс орнын ұсынды. Қатысушылар тікелей жұмыс берушілермен жүздесіп, сұхбаттасу және жұмысқа орналасу мүмкіндігіне ие болды. Бұл тәсіл еңбек нарығындағы нақты сұраныс пен ұсыныстың үйлесуіне жол ашты.
Шара барысында аудан әкімі Асқар Естібаев пен аудандық мәслихат төрағасы Серғали Сәрсенбаев қатысып, тұрғындармен пікір алмасып, белсенді азаматтардың бастамаларын жоғары бағалады. Әкім өз сөзінде жастарды тұрақты жұмыспен қамту мен кәсіпкерлікті қолдаудың өңірдің әлеуметтік-экономикалық дамуы үшін маңызды екенін атап өтті.
Аудан басшылығының тапсырмасына сәйкес, бұл жәрмеңкеде жастарды жұмыспен қамтуға басымдық берілді. Қазіргі таңда Түлкібас ауданында 30 мыңнан астам жас болса, олардың 900-ге жуығы ресми түрде жұмыссыз ретінде тіркелген. Сол себепті жастарға арналған арнайы вакансиялар мен кәсіби бағдар беру бағытындағы ақпараттар ұсынылды.
Жәрмеңкеде мемлекеттік мекемелер мен жеке кәсіпорындар қатарынан 25 жұмыс беруші қатысты. Олар білім беру, денсаулық сақтау, ауыл шаруашылығы, қызмет көрсету және өндіріс салаларындағы түрлі лауазымдарды ұсынды. Сонымен бірге ауданның бірнеше ауылдық округтерінен келген жастар өз түйіндемелерін тапсырып, бос орындарға үміткер ретінде тіркелді.
Жәрмеңке барысында еңбек нарығына қажетті жаңа мамандықтарға басымдық беріліп, жұмысқа орналасу шарттары мен жалақы деңгейі туралы ақпараттар берілді. Сонымен қатар «Мансап орталығының» мамандары мемлекеттік бағдарламалар аясындағы гранттар мен жеңілдетілген несиелер жөнінде кеңес өткізді. Бұл мүмкіндік өз кәсібін ашқысы келетін азаматтар үшін үлкен қолдау болды.
Шарада ерекше назарды өз ісін мемлекеттік қолдау арқылы жолға қойған кәсіпкерлер де өзіне аударды. Олар қайтарымсыз гранттар мен «Жұмыспен қамту» бағдарламасы арқылы ашылған жеке кәсіпорындарын таныстырып, өз өнімдерін көрмеге қойды. Көрмеде азық-түлік, қолөнер бұйымдары мен тұрмыстық заттар сатылымға шығарылды.
Жәрмеңке алаңы тұрғындар үшін тек жұмыс іздеудің ғана емес, тәжірибе алмасу мен өз кәсібін бастауға шабыт алатын алаңға айналды. Көптеген жастар жұмыс берушілермен келісімге келіп, нақты жұмысқа орналасуға мүмкіндік алды.
Мемлекет тарапынан ұсынылып отырған «Жастар практикасы», «Бірінші жұмыс орны», «Күміс жас» сынды бағдарламалар туралы ақпараттар да кеңінен түсіндірілді. Бұл бағдарламалар жас мамандардың тәжірибе жинауына және алғашқы еңбек жолын бастауына жол ашады.
Түлкібас ауданында мұндай жәрмеңкелер тұрақты түрде өткізіліп тұрады. Соңғы жылдары осындай шаралар арқылы жүздеген азамат жұмысқа орналасты, ал ондаған жас гранттық қолдау арқылы өз кәсібін ашты.
Жергілікті билік өкілдері мұндай шаралардың өңір экономикасына тікелей оң әсер ететінін атап өтуде. Өйткені әрбір жұмысқа орналасқан азамат – әлеуметтік тұрақтылықтың және отбасылық әл-ауқаттың кепілі.
Түлкібас ауданындағы бұл жәрмеңке – облыстағы еңбек нарығын дамыту бағытындағы жүйелі жұмыстың бір бөлігі. Алдағы уақытта да аудан әкімдігі мен «Мансап орталығы» бірігіп, жастарды жұмыспен қамту, кәсіптік оқыту және кәсіпкерлікті дамыту ісінде нақты нәтижелерге қол жеткізуді көздеп отыр.
