Түркістан облысында халықты таза әрі үздіксіз ауыз сумен қамтамасыз ету бағытында жүйелі жұмыстар жүргізілуде. Соның ішінде Сауран ауданында қолға алынған Ескі Иқан ауылына дейінгі магистральді су құбырының құрылысы — өңірдің әлеуметтік дамуы мен тұрғындардың тұрмыс сапасын жақсартуға бағытталған маңызды инфрақұрылымдық жоба.
Жоба 2024 жылы басталып, жыл соңына дейін толық аяқталып, пайдалануға берілуі жоспарланып отыр. Құрылыстың басты мақсаты — аудан халқын сапалы, санитарлық талаптарға сай ауыз сумен қамтамасыз ету және су тапшылығы мәселесін түбегейлі шешу.
Аталған құрылыс жұмыстары Сауран ауданы әкімдігінің «Тұрғын үй-коммуналдық шаруашылық, жолаушылар көлігі және автомобиль жолдары бөлімі» мемлекеттік мекемесінің тапсырысымен іске асырылып жатыр. Қазіргі таңда мердігер ұйым барлық инженерлік-техникалық шешімдерді сақтай отырып, жұмыстарды кестеге сай жүргізуде.
Магистральді су құбырының жалпы ұзындығы 45 898 метрді құрайды. Бұл — аудан аумағындағы ең ірі инфрақұрылымдық жобалардың бірі. Құрылғының есептік өнімділігі тәулігіне 3135,3 текше метр, яғни сағатына 188,23 текше метр немесе 42,29 литр/секунд су өндіруге мүмкіндік береді. Ал жүйенің қуаттылығы шамамен 60 кВт. Бұл көрсеткіш аудан тұрғындарын толықтай сумен қамтуға жеткілікті.
Су жүйесінің құрылысы аяқталған соң Ескі Иқан елді мекенімен қатар, оған жақын орналасқан бірнеше ауыл тұрғындары тұрақты әрі сапалы ауыз суға қол жеткізеді. Бұған дейін кейбір елді мекендерде ауыз су тек кесте бойынша беріліп келген болса, енді жаңа жүйе іске қосылған соң су тәулік бойы үздіксіз беріледі.
Жергілікті билік өкілдерінің айтуынша, бұл бастама өңірдің әлеуметтік инфрақұрылымын дамыту бағытындағы маңызды жобалардың бірі саналады. Сауран ауданында соңғы жылдары инженерлік-коммуникациялық жүйелер жаңартылып, тұрғындардың тұрмыстық жағдайын жақсартуға басымдық берілуде.
Қазіргі таңда нысанда топырақ қазу, құбыр төсеу және сорғы станцияларын орнату жұмыстары жүргізілуде. Барлық құрылыс барысы техникалық қадағалау қызметінің бақылауында. Сонымен қатар сапаны сақтау мақсатында заманауи материалдар пайдаланылып, экологиялық және санитарлық стандарттар толық ескерілуде.
Ескі Иқан ауылы мен оған іргелес елді мекендердің тұрғындары бұл жобаны үлкен үмітпен күтуде. Олар үшін таза су — күнделікті өмірдің маңызды қажеттілігі. Бұрын кейбір үйлерде судың қысымы төмен болып, тұрмыстық қажеттіліктерді қамтамасыз ету қиындық тудырған. Енді жаңа магистраль іске қосылған соң мұндай мәселе шешімін таппақ.
Аудан әкімдігі мен мердігер компания өкілдері нысанды сапалы әрі белгіленген мерзімде аяқтауға мүдделі. Бұл жоба жүзеге асқанда, шамамен 5 мыңға жуық тұрғын таза ауыз сумен қамтамасыз етіледі деп күтілуде.
Сауран ауданындағы бұл инфрақұрылымдық бастама өңірдің даму қарқынын арттырумен қатар, тұрғындардың денсаулығына, тұрмыс сапасына және экологиялық тұрақтылыққа оң әсер етпек. Ауыз су — халықтың әл-ауқатын көрсететін басты көрсеткіштердің бірі, ал осындай жобалардың жүзеге асуы Түркістан облысының әлеуметтік-экономикалық дамуының айқын дәлелі болып отыр.
