Түркістан облысында экологиялық тұрақтылық пен табиғатты сақтау бағытында жаңа бастамалар қолға алынуда. Облыс әкімінің орынбасары Нұрбол Тұрашбеков пен «Tasbaqa» табиғатты қорғау қорының басшысы Юлия Цаугг (Yuliya Zaugg) арасындағы кездесу осы бағыттағы өзара ынтымақтастықты нығайтуға арналды.
Кездесуде тараптар өңірде экологиялық ахуалды жақсарту, жануарлар дүниесін қорғау және топырақтың құнарлылығын сақтау жөніндегі бірлескен шараларды талқылады. Қор басшысы облыс әкімдігі тарапынан көрсетілген қолдау үшін алғысын білдіріп, Түркістанның экологиялық жобаларға ашық өңір екенін ерекше атап өтті.
Юлия Цаугг өз сөзінде 2026 жылдың көктемінде өтетін Аймақтық климаттық саммитке дайындық барысы туралы айтты. Ол саммит аясында Түркістан облысында жүзеге асырылып жатқан нақты экологиялық жобалар мен табиғатты қорғау тәжірибелері таныстырылатынын жеткізді. Саммиттің басты тақырыптары — климаттың өзгеруіне бейімделу, су және азық-түлік қауіпсіздігін қамтамасыз ету, жерді тұрақты пайдалану болмақ. Бұл бағыттарда Түркістан облысының жетістіктері халықаралық деңгейде үлгі ретінде көрсетіледі.
Кездесуде сондай-ақ өңір аумағынан сирек кездесетін жануарлар мен өсімдіктерді релокациялау, яғни олардың тіршілік ету аймағын қорғау мақсатында басқа өңірлерге көшіру мүмкіндігі талқыланды. Қор жетекшісі бұл тәсілдің экожүйелерді сақтауда тиімді әдіс екенін айтып, табиғатты қалпына келтіру бағытында мамандармен пікір алмасты.
Өз кезегінде облыс әкімінің орынбасары Нұрбол Тұрашбеков экологиялық бастамаларға белсене қатысып жүрген қор өкілдеріне ризашылығын білдірді. «Біздің ортақ мақсатымыз — табиғатты сақтау арқылы болашақ ұрпаққа таза экологиялық мұра қалдыру. Соңғы жылдары облыста табиғатты қорғау бағытында нақты нәтижелер бар. Қор мен әкімдік бірлесе атқарған жұмыстардың арқасында көптеген проблемалық нысандар қалпына келтірілді», – деді ол.
Жыл басынан бері «Tasbaqa» қоры және жергілікті билік органдарының бірлескен еңбегі нәтижесінде Отырар, Бәйдібек, Ордабасы, Сарыағаш және Келес аудандарында табиғи аймақтарды қорғау шаралары күшейтілді. Экологиялық мониторинг нәтижесінде анықталған бірқатар кемшіліктер жойылып, заңсыз қоқыс орындары мен экожүйеге зиян келтіретін факторлар бойынша нақты шаралар қабылданды.
Тараптар алдағы уақытта да ынтымақтастықты жалғастырып, экологиялық жобаларды бірлесіп жүзеге асыруға уағдаласты. Әсіресе, жергілікті мектептер мен жоғары оқу орындарында экологиялық ағарту бағдарламаларын дамыту, тұрғындар арасында табиғатты қорғау мәдениетін қалыптастыру және өңірдің биоалуантүрлілігін сақтау мәселелеріне ерекше назар аударылмақ.
Кездесу қорытындысында Нұрбол Тұрашбеков Түркістан облысының экологиялық әлеуетін арттыруда үкіметтік емес ұйымдар мен халықаралық серіктестіктердің маңызы зор екенін атап өтті.
Табиғатты қорғау – тек биліктің немесе қорлардың ғана емес, бүкіл қоғамның ортақ ісі. Түркістан облысында бұл бағыттағы жұмыстар жүйелі жүргізіліп, табиғи байлықты сақтауға бағытталған жаңа бастамалар жалғасуда.
