Түркістан облысы еліміздің қарқынды дамып келе жатқан аймақтарының біріне айналды. Соның ішінде экономиканың жаңа драйвері ретінде «Turan» арнайы экономикалық аймағы (АЭА) ерекше маңызға ие болып отыр. Жобаның ауқымы да, әлеуеті де үлкен: қазіргі таңда АЭА аумағында жалпы құны 1,06 трлн теңгені құрайтын 189 жоба тіркелген. Бұл жобалар толық жүзеге асқанда 12 713 тұрақты жұмыс орны ашылады деп жоспарлануда.
«Turan» АЭА – Түркістан облысының аумағында орналасқан арнайы экономикалық аймақтардың ішіндегі ең ірісі. Жалпы көлемі – 4 414 гектардан астам. Бұл аймақ 9 қосалқы кластерге бөлінген және әрқайсысы өзіндік салаға бағытталған – өнеркәсіп, құрылыс индустриясы, өңдеу, агроөнеркәсіп, логистика сынды бағыттарды қамтиды. Қазіргі таңда 40 жоба іске қосылып, 1 353 адамға тұрақты жұмыс орны ұсынылды. Бұл көрсеткіштің өзі өңірдегі индустриялық-инновациялық дамудың нақты нәтижесін көрсетеді.
Жуырда Түркістан облысы әкімінің орынбасары Талғат Қозбековтің төрағалығымен өткен мәжілісте АЭА аумағындағы инфрақұрылым мәселелері, инженерлік-коммуникациялық жүйелердің жай-күйі, жер телімдерін рәсімдеу және жобалардың жүзеге асу барысы жан-жақты талқыланды. Жиында облыстық басқарма басшылары мен АЭА әкімшілігі, жауапты мекемелер мен инвесторлар бас қосып, өзекті мәселелерге нақты шешімдер ұсынды.
Талғат Қозбеков өз сөзінде АЭА-ның тиімді жұмыс істеуі үшін инженерлік инфрақұрылымның толық әрі сапалы болуы шешуші рөл атқаратынын атап өтті. Ол жауапты органдарға жобаларды жүзеге асыру қарқынын бәсеңдетпеуді, бюрократиялық кедергілерді барынша азайтып, рұқсат беру құжаттарын рәсімдеу рәсімдерін жеделдетуді тапсырды. Сонымен қатар, әр жоба бойынша ай сайынғы мониторинг жүргізу қажеттігін ескертті. Бұл – жобалардың жүйелі бақылануына және межеленген нәтижеге уақытылы қол жеткізуге бағытталған нақты тапсырма.
Жиын барысында облыстық өнеркәсіп және индустриалды-инновациялық даму басқармасының басшысының міндетін атқарушы Қанат Шонбасов арнайы экономикалық аймақтың жай-күйіне тоқталып, қазіргі кезде кездесіп отырған кедергілер мен ұсыныстарды баяндады. Инфрақұрылым жетіспеушілігі, инженерлік желілерге қосылудағы техникалық кідірістер сынды мәселелерді кезең-кезеңімен шешу жолдары ұсынылды. Әсіресе жаңа жобаларды уақытылы қосу үшін инфрақұрылымды алдын ала әзірлеудің маңызы ерекше екенін атап өтті.
Айта кетерлігі, арнайы экономикалық аймақтың негізгі мақсаты – өңірге инвестиция тарту, өндіріс көлемін ұлғайту және жаңа жұмыс орындарын ашу арқылы экономикалық өсімге жол ашу. Осы орайда Түркістан облысы бұл жобаны іске асыруда еліміздегі үлгілі өңірлердің біріне айналып келеді. Себебі бұл – жай ғана экономикалық жоба емес, аймақтың әлеуметтік дамуына да тікелей әсер ететін маңызды бастама.
Облыс әкімінің орынбасары жиын соңында бұл аймақтар Түркістан өңірінің экономикалық дамуының локомотивіне айналуы тиіс екенін айтты. Әрбір мекеме, басқарма мен жобаны іске асырушы тарап өзіне жүктелген міндетті сапалы әрі уақытылы орындауға тиіс. Себебі бұл тек облыстың ғана емес, бүкіл еліміздің өндірістік және инвестициялық әлеуетіне оң әсер ететін кешенді жобалардың бірі.
Қорыта айтқанда, «Turan» арнайы экономикалық аймағы – Түркістан облысының жаңа экономикалық келбетін қалыптастырып жатқан стратегиялық алаң. Оған бөлінген инвестиция көлемі, құрылған жұмыс орындары және нақты нәтиже көрсеткіштері – бұл бастаманың өңірдің болашағы үшін маңызды екенін дәлелдейді. Ендігі кезекте инфрақұрылымды уақытында әрі сапалы жеткізу, инвесторларға барынша қолайлы жағдай жасау – басты міндет болып қала бермек.
