Түркістан қаласы бүгінде тек облыс орталығы ғана емес, бүкіл түркі әлемінің мәдени және рухани ордасына айналу жолында жүйелі дамып келеді. Қалада жүргізіліп жатқан кешенді инфрақұрылымдық жобалар, туристік нысандар мен «ақылды қала» тұжырымдамасына сай бастамалар өңірдің әлеуметтік-экономикалық әлеуетін арттыруға бағытталған. Бұл істер Түркістан облысының әкімі Нұралхан Көшеровтің тікелей бақылауында.
Облыс әкімі аппаратының басшысы Еркебұлан Дауылбаев жуырда Түркістан қаласына арнайы келіп, жүзеге асып жатқан жобалармен танысты. Сапар барысында қаладағы құрылыс алаңдарын аралап, жобалардың орындалу барысын қадағалады. Атап айтқанда, «Ақылды аялдама» мен «Көшелерді ақылды жарықтандыру» жобаларына ерекше назар аударылды. Бұл жобалар заманауи технологияларды қолдану арқылы қала тұрғындары мен қонақтарының өмір сапасын жақсартуға бағытталған.
«Ақылды аялдама» – қала жолаушылары үшін қолайлы жағдай жасауға арналған жоба. Мұнда ауа райының қолайсыз жағдайларынан қорғану мүмкіндігі қарастырылып, аялдамада қоғамдық көліктердің келу уақыты туралы нақты ақпарат беріледі. Бұл цифрлық шешім қаладағы қоғамдық көлік қатынасын реттеуге және тұрғындар уақытын тиімді пайдалануға мүмкіндік береді. Жобаны жүзеге асыру бойынша жауапты мекеме мен жеке инвесторлар арасында келіссөздер жүргізіліп, серіктестік механизмдері талқылануда. Ал көше жарықтандыру жүйесі бойынша ұсыныстар жан-жақты зерделеніп, тиімді нұсқалары қарастырылып жатыр.
Сонымен қатар, Еркебұлан Дауылбаев Түркістан қаласында салынып жатқан жаңа мешіттің құрылыс барысын да тексерді. 5000 адамға арналған бұл зәулім діни нысан – қаланың рухани және сәулеттік келбетін толықтыратын маңызды құрылыс. Қазір мешіттің негізгі жұмыстары аяқталуға жақын, нысан заманауи талаптарға сай салынып жатыр. Құрылыс барысына жауапты мердігерге нақты тапсырмалар берілді.
Қала маңындағы экологиялық және туристік маңызы бар тағы бір нысан – Шаға жасанды көлі. Аппарат басшысы бұл аумақты аралап, жергілікті билік пен инвесторлар арасында жүргізілген жұмыстармен танысты. Шаға көлі – «Түркістан» туристік-рекреациялық орталығы жобасының маңызды бөлігі болып саналады. Көлдің ауданы 81 гектарды құрайды, ал су сыйымдылығы – 2,3 млн текше метр. Ұзындығы 6,1 шақырымды қамтитын арналар жүйесі көктемгі су тасқынын реттеу арқылы қала аумағын қорғауға мүмкіндік береді. Бұл жоба тек инженерлік мақсатта ғана емес, сонымен қатар демалыс пен туризмді дамытуға да бағытталған.
Жоба аясында жағажай аймағын құру, автоматтандырылған суару жүйесі, ұңғымалар, кәріз жүйелері және сервистік ғимараттар салу жұмыстары атқарылған. Көл аумағын толыққанды туристік аймаққа айналдыру үшін жергілікті әкімдік пен жеке инвесторлар тығыз жұмыс жүргізіп жатыр. Қалған жұмыстардың барлығы инвесторлар есебінен жүзеге асырылмақ. Бұл өз кезегінде өңірге инвестиция тарту мен жеке сектордың белсенділігін арттыруға мүмкіндік береді.
Жалпы, Түркістан қаласын дамыту – еліміздің стратегиялық бағыттарының бірі. Мұндағы әрбір жоба өңір тұрғындарының өмір сапасын арттырып, қала инфрақұрылымын жаңғыртуға үлес қосуда. Туризм, көлік, инфрақұрылым, рухани нысандар, заманауи технологиялар – бәрі бір арнаға тоғысып, қаланың жаңа тынысын ашып жатыр. Билік тарапынан жүргізіліп жатқан бақылау мен қоғамдық пікірді ескере отырып, бұл жұмыстардың сапалы әрі уақытылы орындалуы қамтамасыз етілуі тиіс.
Түркістан – тарих пен болашақ тоғысқан қала. Оның дамуы тек облыс көлемінде емес, бүкіл республика үшін маңызды. Сол себепті де қалада қолға алынған әрбір бастамаға жіті назар аударылып, бақылау жүйесі күшейтілуде. Осы бағыттағы жұмыстар жалғасып, Түркістанды түркі әлемінің шынайы орталығына айналдыру жолында нақты қадамдар жасалуда.
