Адал еңбек – адамның абыройын асқақтатып, өміріне мән беретін ең асыл қасиеттердің бірі. Қоғамда өз ісін сүйіп, оған бар жауапкершілігімен қарайтын жандар бар. Солардың бірі – Шымкент қаласының дене шынықтыру және спорт басқармасына қарасты «Шымкент» ойын түрлерінен спорт клубының инспекторы (кадр маманы), ҚР Мәдениет, спорт және ақпарат қызметкерлері салалық кәсіподағының Шымкент қалалық филиалының мүшесі Ләззат Хасылбекқызы Сәрсенбаева.
Ләззат Хасылбекқызы 1979 жылы 16 наурызда Өзбекстан Республикасының Науаи қаласында дүниеге келген. Ол еңбекқорлық пен ұқыптылықты жастайынан бойына сіңіріп өсті. 1986–1996 жылдары Науаи қаласындағы орта мектепте білім алып, кейін кәсіби жолын таңдауда нақты мақсат қойды. 1996–1998 жылдары Шымкент қаласындағы Экономика және құқық колледжінде «Салық және қаржы» мамандығы бойынша білім алып, еңбекке алғашқы қадам жасады.
Білімін жетілдіру мақсатында ол 2009–2012 жылдары Жамбыл гуманитарлық-техникалық университетін тәмамдап, «Экономика және бизнес» мамандығы бойынша жоғары білім алды. Осылайша, еңбек пен білімді қатар ұштастырған Ләззат Хасылбекқызы кәсіби салада үлкен жетістіктерге жетті.
Еңбек жолын 1998 жылы Науаи қаласының салық инспекциясында салық инспекторы болып бастаған. Өз ісіне адалдығы мен талапшылдығының арқасында 2000–2015 жылдар аралығында бас салық инспекторы қызметін атқарды. Бұл кезеңде ол жауапты шешім қабылдай білетін, ұйымдастырушылық қабілеті жоғары маман ретінде танылды.
Кейінгі жылдары да Ләззат Хасылбекқызы жаңа тәжірибелер жинақтап, түрлі ұйымдарда абыроймен қызмет етті. 2015–2017 жылдары Алматы қаласындағы «Алматэлектротранс» мекемесінде іс жүргізуші болып еңбек етсе, 2019–2020 жылдары Шымкент қаласындағы «Қаратау» ЖШС-де кадр бөлімінің бас менеджері қызметін атқарды. 2021–2022 жылдары «Сбербанк» АҚ ЕБ филиалында кадр бөлімінің жетекші маманы ретінде адам ресурстарын басқару саласында мол тәжірибе жинақтады.
2022 жылдан бастап ол «Шымкент» ойын түрлерінен спорт клубында инспектор қызметін атқарып келеді. Бұл қызмет – үлкен жауапкершілік пен жоғары кәсібилікті талап ететін сала. Кадр жүйесін басқару, құжат айналымын реттеу, ұжымдағы үйлесімділікті сақтау – оның күнделікті жұмысының бір бөлігі.
Ләззат Хасылбекқызы әріптестері арасында өз ісіне адал, тиянақты әрі әділ маман ретінде беделге ие. Ол кез келген істі сабырмен шешіп, ұжымда жағымды атмосфера қалыптастырып отырады.
«Еңбегің адал болса, абырой өзіңді табады» – бұл оның өмірлік ұстанымы.
Ол кәсібилігімен қатар, отбасына да ерекше мейіріммен қарайтын жан. Үш баланың анасы, шаңырақтың берекесін келтіріп отырған асыл жар. Жұмыс пен отбасы арасындағы теңгерімді сақтай білуі – оның табандылығы мен өмірге деген позитивті көзқарасының айғағы.
Ләззат Сәрсенбаева – еңбекқорлық пен адалдықтың бейнесі, қарапайым еңбегі арқылы ұжымға жылылық сыйлап жүрген шынайы еңбек адамы. Оның өмір жолы – табандылықтың, жауапкершіліктің және адамгершіліктің үлгісі.
Міне, осындай жандардың арқасында Шымкент қаласының еңбек рухы артып, қоғамның дамуы мен бірлігі нығая түсуде. Ләззат Хасылбекқызының адал еңбегі – жас ұрпаққа өнеге, ал өмірлік ұстанымы – нағыз еңбек адамының айқын белгісі.
