Шымкент қаласында пробация қызметі есебінде тұрған азаматтарды жұмыспен қамту және қоғамға бейімдеу мақсатында жаңа әлеуметтік бастама іске қосылды. Еңбек мобильділігі орталығының қолдауымен ашылған «Жұмыспен қамту бұрышы» пилоттық жобасы пробация жүйесіндегі азаматтарға кәсіби тұрғыда жаңа мүмкіндіктер беруді көздейді.
Бұл жоба – мемлекет тарапынан әлеуметтік әділеттілікті қамтамасыз ету және әр азаматқа еңбек арқылы жаңа өмір бастауға мүмкіндік жасау жолындағы маңызды қадам. Қаланың барлық аудандарында орналасқан Мансап орталықтарының мамандары пробация қызметімен тығыз байланыста жұмыс атқарып, есепте тұрған азаматтарға мемлекеттік бағдарламалар мен Enbek.kz порталының мүмкіндіктері туралы түсіндіру жұмыстарын жүргізуде.
Жоба аясында мамандар пробация есебіндегі азаматтарға жұмыссыз ретінде тіркелу, онлайн-вакансиялармен танысу және кәсіби даярлық курстарына қатысу тәртібі бойынша практикалық көмек көрсетіп келеді. Бұл шаралар қоғамнан оқшауланған немесе өмірлік қиын жағдайға тап болған адамдарды қайта бейімдеудің тиімді тетігіне айналып отыр.
Биылғы жоспар бойынша пробация қызметі есебінде тұрған 76 адамды жұмыспен қамту шараларына тарту көзделген. Қазіргі таңда олардың 44-і тұрақты еңбекке орналасып үлгерді. Сонымен қатар, бас бостандығынан айыру мекемелерінен босап шыққан 51 азаматтың 13-і жұмысқа жолданған. Бұл көрсеткіштер жобаның нақты нәтижесін айқындайды және оның әлеуметтік тиімділігін дәлелдейді.
Мамандардың айтуынша, «Жұмыспен қамту бұрышы» тек жұмысқа орналастыру алаңы ғана емес, сонымен бірге азаматтардың құқықтық сауатын арттыру, әлеуметтік бейімдеу және өмірге деген сенімін қалпына келтіру алаңы болып отыр. Мұнда әр азаматпен жеке жұмыс жүргізіліп, психологиялық және кәсіби кеңес беріледі.
Бұл бастама пробация қызметі мен Еңбек мобильділігі орталығының өзара ынтымақтастығының нақты нәтижесі болып табылады. Осындай бірлескен жобалар қоғамдағы құқық бұзушылықтың алдын алып, әлеуметтік бейімделу деңгейін арттыруға ықпал етеді.
Алдағы уақытта жобаны кеңейту жоспарланып отыр. Осы арқылы пробация есебіндегі азаматтарға жаңа мамандық меңгеру, әлеуметтік кәсіпкерлікке тартылу және қысқа мерзімді оқыту бағдарламаларына қатысу мүмкіндігі ұсынылмақ.
Шымкент қаласында қолға алынған бұл жоба – әрбір адамның қоғамға қайта оралып, өз орнын табуына мүмкіндік беретін нақты қолдау құралы. «Жұмыспен қамту бұрышы» бастамасы еңбек арқылы жаңа өмір бастауға ниетті жандарға сенім ұялатып, әлеуметтік бейімделу жолында маңызды рөл атқаруда.
