Шымкент қаласындағы «Shymkent Plaza» ойын-сауық орталығында полицейлердің күнделікті қызметі мен жанқиярлық еңбегіне арналған «Заң мен Тәртіп» атты фотокөрме ұйымдастырылды.
Көрмеде құқық қорғаушылардың күнделікті көшелерді патрульдеуінен бастап, барынша зейін мен батылдықты, кәсібилікті талап ететін сәттеріне дейінгі жұмысын шынайы бейнелейтін жарқын әрі әсерлі фотосуреттер қойылды.
Әрбір сурет полицейлердің қиын да абыройлы еңбегі туралы баяндайтын тірі құжат іспетті.
Іс-шараның ерекше атмосферасын Ұлттық ұлан оркестрінің өнері толықтыра түсті.
Фотокөрмені жүздеген адам, оның ішінде ересектер мен балалар да тамашалады. Қонақтардың қатарында арнайы «Жас сақшы» сыныптарының оқушылары да болды. Бұл олар үшін жауапкершілік пен қоғамға қызмет етудің көрнекі әрі шабыттандыратын үлгісі болды. Жастар фотоэкспозициямен танысып, сұрақтар қойып, өз әсерлерімен бөлісті.
– Бұл көрме арқылы полиция қызметкерлерінің қоғам тыныштығын күзету жолындағы еңбегімен жақынырақ таныстық. Мұндағы суреттерден олардың табандылығы мен өз ісіне адалдығы көрінеді. Әр адам көрмеден өзіне қажетті ой түйеді: біреу үшін – бұл үлгі алатын мамандық, енді біреу үшін – құрметке лайық еңбек, ал кейбіреулерге – шабыт беретін оқиға, – деп бөлісті келушілердің бірі.
Ұйымдастырушылардың айтуынша, шараның басты мақсаты – халықтың сенімін арттыру мен полицейдің бейнесін Заң мен Тәртіптің қорғаушысы ретінде қалыптастыру.
Мұндай мәдени форматтағы іс-шаралар полиция қызметінің тек тәртіп сақшысы ретіндегі емес, қоғамның ажырамас бөлігі екенін көрсетеді. Көрме арқылы азаматтар тәртіп сақшыларының жұмысына жаңа көзқараспен қарап, олардың күнделікті өмірдегі күрделі әрі жауапты қызметін бағалай алды. Әсіресе фотосуреттерде бейнеленген батылдық пен адамгершілік көріністері көрерменге терең ой салып, полиция қызметінің мәнін айқындай түсті.
Шара аясында келушілерге құқықтық мәдениет пен қоғамдық тәртіптің маңызы туралы ақпараттық буклеттер таратылды. Сондай-ақ балалар мен жасөспірімдерге арналған викториналар мен қауіпсіздік сабақтары өткізілді. Бұл олардың заңға деген құрметін арттырып, өз қауіпсіздігіне бейжай қарамауға үндеді.
Көрмеге келген тұрғындар тәртіп сақшыларымен еркін әңгімелесіп, олардың қызметі мен күнделікті міндеттері жөнінде сұрақтар қойды. Қалалық полиция департаментінің өкілдері қоғаммен ашық диалог орнату – өзара сенім мен түсіністіктің кепілі екенін атап өтті.
Осындай бастамалар азаматтар мен полиция арасындағы байланысын нығайтып, қоғамдық келісім мен қауіпсіздікті қамтамасыз ету ісінде маңызды рөл атқарады. «Заң мен Тәртіп» көрмесі – бейбіт өмірдің бағасын сезіндіретін және ел бірлігін дәріптейтін маңызды мәдени оқиғаға айналды.
