Кәсіпкерлік – тек пайда табудың ғана емес, еңбекқорлық пен табандылықтың жемісі. Осы сөздердің мәнін өз ісімен дәлелдеп жүргендердің бірі – шымкенттік жас кәсіпкер Асқар Әсет Ахатұлы. Ол пластик терезе мен есік өнімдерін жасап, осы салада төрт жылдан бері табысты еңбек етіп келеді.
Әсет Ахатұлының кәсіпке деген қызығушылығы қарапайым цехта жұмыс істеуден басталған. Алғашқыда жалдамалы жұмысшы ретінде терезе-есік құрастырудың қыр-сырын меңгерген ол, біртіндеп кәсіби шеберлік жинап, нарық талабын зерттеді. Білім мен тәжірибені ұштастыра отырып, ол өз ісін бастауға тәуекел етті. Алғашқыда қарапайым тапсырыстармен шектелсе де, уақыт өте келе тұтынушылардың сенімін ақтап, тапсырыс көлемін арттырды.
Бүгінде Әсет иелік ететін шеберханада күн сайын ондаған терезе мен есік жасалып, Шымкент қаласы мен маңайындағы елді мекендерге жеткізіледі. Ол тек өнім сапасына ғана емес, тұтынушымен дұрыс қарым-қатынас орнатуға да ерекше көңіл бөледі. "Кәсіптің берекесі – адал қызмет пен тұтынушының көңілінен шығуда", – дейді кәсіпкер.
Кәсіптің өркендеуімен қатар, ол жергілікті халықты жұмыспен қамтуға да үлес қосып отыр. Қазіргі таңда шеберханада 5 тұрақты қызметкер жұмыс істейді. Олар – өз ісін жақсы білетін мамандар. Әсет қызметкерлерінің кәсіби дамуына жағдай жасап, қажет құрал-жабдықтармен қамтамасыз етіп отырады.
Кәсіпкердің айтуынша, пластик терезе мен есікке деген сұраныс жыл сайын артып келеді. Бұл – құрылыс индустриясының дамуымен және халықтың өмір сүру сапасына деген талабының өсуімен тікелей байланысты. Әсет бұл мүмкіндікті тиімді пайдаланып, өнім түрлерін көбейтіп, техникалық мүмкіндіктерін кеңейтуге күш салуда. Қазір ол автоматтандырылған жаңа құрылғылар сатып алуды, сондай-ақ онлайн тапсырыс қабылдау жүйесін енгізуді жоспарлап отыр.
Жас кәсіпкер үшін мемлекеттің қолдауы да маңызды рөл атқарған. Ол кәсібін дамытудың бастапқы кезеңінде мемлекеттік бағдарламалар арқылы кеңес алғанын және оқыту курстарына қатысқанын айтады. Осындай қолдаулардың арқасында бизнес-жоспар құру, салықтық рәсімдер және нарықпен жұмыс істеу бағытында маңызды білімдерге ие болған.
Бүгінгі таңда Әсет Ахатұлы өзінің табысты ісімен жастарға үлгі болып отыр. Ол кәсіпті нөлден бастап, табандылықпен дамытудың нақты үлгісін көрсетіп келеді. Қарапайым жұмысшыдан табысты кәсіп иесіне айналған ол жастарды жалқаулыққа салынбай, кәсіпке батыл қадам жасауға шақырады.
Асқар Әсет Ахатұлының табысты жолы – еңбек пен сенімнің нәтижесі. Ол өз ісін сүйіп, адал қызмет етудің арқасында халықтың сеніміне ие болып отыр. Алдағы уақытта ол кәсібін кеңейтіп, жаңа жұмыс орындарын ашуды көздеп отыр. Бұл – еліміздің кәсіпкерлік саласындағы үлгілі әрі үмітті бастамалардың бірі.
