Қыркүйек айының алғашқы жексенбісінде елімізде дәстүрлі түрде мұнай-газ саласы қызметкерлерінің кәсіби мерекесі атап өтіледі. Бұл — тек энергетика секторында еңбек ететін жұмысшылардың ғана емес, жалпы ұлттық экономиканың жүрегі саналатын саланың барша қызметкерлері үшін маңызды күн. Биыл Шымкент қаласында ұйымдастырылған салтанатты жиын ерекше мазмұнмен өтті. Қала басшысы шараға қатысып, мұнай-газ саласының ардагерлері мен қазіргі қызметкерлерін құттықтады.
Мұнай-газ саласы — еліміздің экономикалық және индустриялық дамуында шешуші рөл атқаратын стратегиялық бағыттардың бірі. Өткен жылы сала өзінің 125 жылдық мерейтойын атап өтсе, биыл Шымкент мұнай өңдеу зауытының құрылғанына 40 жыл, ал «QazaqGaz» ұлттық компаниясының құрылғанына 25 жыл толып отыр. Бұл көрсеткіштер Қазақстандағы мұнай-газ өнеркәсібінің терең тарихы мен тұрақты дамуын көрсетеді. Бұл даталар тек ресми мерейтойлар ғана емес, сондай-ақ салада еңбек етіп жатқан мыңдаған адамдардың қажырлы еңбегінің нәтижесі мен табыстарының айғағы.
Салтанатты жиында сөз сөйлеген қала әкімі мұнай-газ саласында еңбек етіп жүрген қызметкерлерге шынайы алғысын білдіріп, олардың адал еңбегі мен кәсіби жауапкершілігін ерекше атап өтті. «QazaqGaz» компаниясының жұмысы бүгінде Қазақстан газ өнеркәсібінің тірегіне айналды. Компанияның соңғы жылдардағы серпінді дамуы – ұлттық брендтің үлгісі. Бұл компания адалдықтың, сенімділіктің және жауапкершіліктің негізінде дамып келеді.
Мерекелік іс-шарада сала қызметкерлеріне Мемлекет басшысының атынан марапаттар мен қала әкімінің Алғыс хаттары табыс етілді. Бұл – олардың еңбегі мен қосқан үлесіне берілген лайықты баға.
Шымкент қаласында да газдандыру саласында ауқымды жұмыстар жүргізілуде. Соңғы екі жылдың ішінде қала аумағында 767 шақырым газ құбыры тартылып, 15 шағынаудан мен тұрғын алапқа көгілдір отын жеткізілді. Бұл – жергілікті биліктің тұрғындардың өмір сапасын арттыруға бағытталған нақты қадамы. Нәтижесінде 28 мыңнан астам үй табиғи газға қосылып, бұрын пешпен немесе баллон газымен жылынып келген отбасылар заманауи және қауіпсіз отынға қол жеткізді.
Қазіргі таңда қаладағы газдандыру деңгейі 94,7 пайызды құрайды. Алдағы кезеңде бұл көрсеткішті 98 пайызға жеткізу жоспарланып отыр. Ол үшін қалада тағы бірнеше нысанда инженерлік желілер салу, жаңа тұрғын алаптарға инфрақұрылым тарту бойынша жобалар қолға алынған.
Жиын соңында қала әкімі мұнай-газ саласы қызметкерлеріне мықты денсаулық, еңбекте сәттілік, отбасыларына береке тілей отырып, елдің экономикалық және энергетикалық қауіпсіздігін қамтамасыз етуде еңбектері орасан екенін атап өтті.
