Бүгін Шымкентте Қ.А.Яссауи ілімін жалғастырушы, түрік жұртына танымал ақын-жазушы Юнус Эмренің ескерткіші қойылды.
Салтанатты шараға қала әкімі Мұрат Әйтенов, Түркия Республикасының сыртқы істер министрі Мевлют Чавушоглу, Түркия Республикасының Шымкент қаласындағы Құрметті Консулдығының құрметті Консулы Асанов Латипша Қаймаханұлы, БАҚ өкілдері мен қала тұрғындары қатысты.
Жиында сөз алған шаһар басшысы жазушы Юнус Эмренің шығармашылары мен өмір жолына тоқталды. “Ю.Эмре бізге Қожа Ахмет Яссауидың сопылық ілімін жалғастырушы ретінде белгілі автор. Оның шығармалары сүйіспеншілік пен мейірімділікке негізделген. Түркі жұртына танымал “Көк түрік ” деп рух берген Мағжан Жұмабаевтың шығармалары да Юнус Эмре есімімен тығыз байланысты”,-деді М.Әйтенов.
Шаһар басшысы Қазақстан Республикасы мен Туркия Республикасы Президенттерінің жыл сайынғы кездесулері достық пен мемлекет аралық қатынастардың беріктігін де тілге тиек етті. Сонымен қатар ол түбі бір түркі жұртының тарихы мен мәдениетінің және рухани байланыстарына негізделген қазақ-түрік достығының дәлелі ретінде Шымкент қаласының Измир, Ескишехир, Адана қалаларымен достық байланыс орнатқанын да атап өтті.
Түркия елімен стратегиялық жоспарлардың, сауда-экономикалық қарым-қатынас пен бірлескен жобалардың жаңа белеске көтерілетініне сенім білдірген қала әкімі Шымкент қаласы мен Түркия Республикасы арасындағы бауырластықтың нығаюына үлкен үлес қосып жүрген Түркия Республикасының Шымкент қаласындағы Құрметті Консулдықтың құрметті Консулы Латипша Қаймаханұлының атқарған еңбегін ескерусіз қалдырмады.
Юнус Эмре, Жүніс Әміре (Ynus Emre) (1240-1321, қазіргі Түркия) - түрік ақыны. Анадолыдағы Қожа Ахмет Иасауи жолын қуған сопылық мектептің негізін қалаушы, түрік ақыны. Өмірі жайлы нақты деректер жоқ. Кейбір ескі қолжазбаларда оның хижра бойынша 720 ж. 82 жасыңда қайтыс болғандығы жазылған. Бұл деректерді оның өз шығармалары да («Насихаттар кітабы») растайды. Жүніс Әміренің қай жерде жерленгені белгісіз. Түркияның әр түрлі аймақтарында Жүніс Әміреге арналып кұлпытастар қойылып, мазарлар салынған. Өлеңдерін Қожа Ахмет Иасауи жолымен халыққа Ислам қағидаларын түсіндіру үшін жазған. Ақын ұғымы бойынша, адам денесі су, топырақ, от, ауалан жаратылған.
Орта Азиялық сопы Қожа Ахмет Ясауидің өлеңдерін ұнатып, Месопотамия, Анадолы және Балқан аймақтарына өзінің өшпес ізін қалдырумен түркі-ислам сопылық әдебиетін негіздеген және оғыз түркілердің ауйзекі тілін жазба тілдік қалыпқа салған. Жеті ғасырлық тарихты қамтыған ақынның тілі қазіргі батыс түрк тілінің өзегін құрайды.
Сөз соңында М.Дүйсенбекұлы жиылған жұртқа ақжарма тілегін жолдап, зор денсаулық, берекелі табыс, бақ-береке тіледі.
ШЫМКЕНТТЕ ЮНУС ЭМРЕГЕ ЕСКЕРТКІШ ҚОЙЫЛДЫ
