Көкшетау орталығындағы «Көкшетау» мәдениет сарайында өрт болып, ғимаратқа айтарлықтай залал келді деп хабарлады Ақмола облыстық Төтенше жағдайлар департаменті.
Өрт салдарынан мәдениет сарайында жүрген 25 адам эвакуацияланған.
«11 тамызжа сағат 10:55-те «Көкшетау» мәдениет сарайының өртеніп жатқаны жайлы хабарлама келіп түсті. Өрт ғимараттың шатырында тұтанған. Дереу дабыл беріліп, жеке құрамның 30-дан астам маманы мен 6 бірлік өрт сөндіру техникасы, сонымен қатар, «Көкшетау Су Арнасы» коммуналдық кәсіпорнының бір техникасы мен бір қызметкері жұмылдырылды. Өрт мәдениет сарайының 10 шаршы метр аумағын қамтыған. Тілсіз жау 11:22-де ауыздықталып, 11.33-те толықтай сөндірілді», - дейді Ақмола облысы Төтенше жағдайлар департаменті бастығының міндетін атқарушы Қанат Доспаев.
Қазіргі уақыта ғимараттың өртенген құрылымдары бұзып алынуда. Өрттің шығу себептері анықталып жатыр.
