Бәйдібек ауданында көпбалалы 29 анаға құрмет көрсетілді. Аудан әкімінің орынбасары Берік Тұрлыбеков алтын құрсақты аналарды қабылдап, құттықтау лебізін білдіріп, Мемлекет басшысының Жарлығына сәйкес бөлінген «Алтын алқа» және «Күміс алқа» төсбелгілерін табыс етті.
Ел демографиясына үлес қосып отырған ақ жаулықты 29 ана бүгін осы марапатқа ие болды. Оның 9-ы – «Алтын алқа», 20-ы – «Күміс алқа» иегері. Бәйдібек ауданында 500-ден аса «Алтын алқа» иегері және 1300-ден аса «Күміс алқа» иеленген аналар тұрады. Сонымен қатар 165 «Батыр ана» мен 200-ден аса І-ІІ дәрежелі «Ана даңқы» ордендерімен марапатталғандар бар. 18 жасқа дейінгі 4 және оданда көп баласы бар аналар саны – 2948.
