Сарыағаш ауданына қарасты Тегісшіл ауылдық округі Таскескен елді мекенінің тұрғыны Динара Маметова үшемді дүниеге әкелді. Үшемдердің үшеуі де ұл. Нәрестелерге ата-анасы Сұлтан, Санжар және Осман деген есімдер берген.
Динара Маметова жеке кәсіппен айналысып отырған көпбалалы ана. Қазіргі таңда барлығы 7 перзент өсіріп отыр.
Түркістан облысы әкімінің бірінші орынбасары Зұлпыхар Жолдасов үшемнің шаңырағына арнайы барып, ата-ананы қуанышты оқиғамен құттықтады. Сәбилерге арналған сыйлықтарын табыстап, отбасыға ақжарма тілегін жеткізді.
Айта кетейік, жыл басынан бері Түркістан облысында 30 095 сәби дүниеге келген. Оның ішінде 312-сі егіздер болса, 7-еуі үшем.
