2026 жылғы 30-31 қазан күндері Шымкент қаласы Қазақстанның 19 қаласында бір мезгілде өтетін Decentrathon 6.0 ауқымды хакатонына қосылады. Іс-шара әзірлеушілерді, студенттерді, жас мамандар мен технологиялық командаларды біріктіріп, заманауи технологиялар мен жасанды интеллект көмегімен нақты міндеттерге шешім әзірлеуге мүмкіндік береді.
Бұл туралы No-comment.kz Шымкент қаласы әкімдігіне сілтеме жасап хабарлайды
Decentrathon 6.0 хакатонын Қазақстан Республикасы Жасанды интеллект және цифрлық даму министрлігінің қолдауымен Astana Hub және Blockchain & AI Technology Center (BAITC) ұйымдастырады. Шымкенттегі іс-шара Цифрландыру басқармасының қолдауымен Shymkent Hub алаңында өтеді.
Бастаманың маңызды бағыттарының бірі – өңірлік IT-экожүйені дамыту және мамандардың тұрғылықты қаласына қарамастан жаңа мүмкіндіктерге қол жеткізуіне жағдай жасау. Бүгінде Decentrathon жеңімпаздарының 39%-ы – Қазақстан өңірлерінен. Бұл еліміздің барлық аймағындағы мамандардың әлеуетін ашудың маңызын көрсетеді.
Алтыншы маусымның хакатоны 48 сағатқа созылады. Шымкенттегі қатысушылар 30 қазанда іс-шара алаңына келіп, дайын шешімдерін 31 қазан күні сағат 23:59-ға дейін тапсыруы қажет.
Шымкент қаласы әкімдігінің қолдауымен қатысушыларға қосымша ынталандыру ретінде 1-орын алған командаға 1,5 миллион теңге көлемінде жүлде қарастырылған.
Хакатонға қатысу тегін. decentrathon.ai сайтында 29 қазанға дейін тіркелуге болады.
Уақыты: 2026 жылғы 30-31 қазан.
Орны: Shymkent Hub, Теріскей шағынауданы, 66/2.
Хакатонға әзірлеушілер, бағдарламашылар, дизайнерлер, аналитиктер, студенттер, жас мамандар мен технологиялық командалар қатыса алады. Жас шектеуі жоқ.
