Шымкент қаласында халықтың өмір сүру сапасын арттыруға бағытталған кешенді жұмыстар жүйелі түрде жалғасуда. Тұрғын үй құрылысы, әлеуметтік нысандарды жаңғырту, қалалық ортаны абаттандыру және ірі инвестициялық жобаларды жүзеге асыру қаланың тұрақты әлеуметтік-экономикалық дамуының негізгі бағыттарына айналып отыр. Бұл бастамалар тұрғындарға қолайлы орта қалыптастырып қана қоймай, өңірдің инвестициялық және туристік әлеуетін де күшейтуде.
Осы жұмыстардың жүзеге асырылу барысын Шымкент қаласының әкімі Ғабит Сыздықбеков қаладағы бірқатар нысандарды аралау барысында тексерді. Сапар аясында Бозарық шағынауданында 30 жаңа пәтердің кілті табысталды. Баспаналар «Отбасы банк» АҚ-ның «2-10-20» және «5-10-20» жеңілдетілген ипотекалық бағдарламалары арқылы берілді. Мұндай бағдарламалар тұрғындардың қолжетімді тұрғын үйге ие болуына мүмкіндік беріп, тұрғын үй құрылығын дамытудың маңызды тетіктерінің бірі болып отыр.
Қала әкімі сондай-ақ Әл-Фараби ауданында орналасқан Қылмыстық-атқару жүйесі департаменті ғимаратының қайта жаңғырту жұмыстарымен танысты. Нысанды жаңарту мемлекеттік мекеменің материалдық-техникалық базасын күшейтіп, қызметкерлер үшін қолайлы еңбек жағдайын жасауға және қауіпсіздік талаптарын жетілдіруге бағытталған.
Қалалық инфрақұрылымды жақсарту жұмыстары «Халық қатысатын бюджет» бағдарламасы арқылы да жалғасуда. Абай ауданындағы ПМК-49 көшесінде бағдарлама аясында абаттандырылған аулада балалар ойын алаңы жаңартылып, спорт және баскетбол алаңдары салынған, сондай-ақ көше жарығы орнатылған. Мұндай жобалар тұрғындардың ұсыныстары негізінде жүзеге асырылып, қалалық ортаның жайлылығын арттыруға мүмкіндік береді.
Бұдан бөлек, Тұрлан шағынауданындағы №122 «Ақ көгершін» бөбекжай-бақшасында күрделі жөндеу жүргізілуде. Жоба аясында ғимарат толық жаңартылып, оған іргелес аумақ абаттандырылады. Мектепке дейінгі білім беру ұйымдарының материалдық базасын жаңарту балаларға қолайлы әрі қауіпсіз орта қалыптастыруға бағытталған маңызды әлеуметтік жобалардың бірі саналады.
Қала әкімі сапары барысында Қаратау ауданында салынып жатқан халықаралық деңгейдегі Novotel қонақүйінің құрылысымен де танысты. Жалпы аумағы 8 мың шаршы метрді құрайтын жеті қабатты қонақүйде 114 нөмір қарастырылған. Жоба іске қосылғаннан кейін бір мезетте 160 қонақты қабылдауға мүмкіндік беріп, қалада 40 жаңа жұмыс орнының ашылуы жоспарланып отыр. Сарапшылардың пікірінше, халықаралық қонақүй желілерінің келуі Шымкенттің туристік инфрақұрылымын дамытуға және шетелдік инвесторлар үшін тартымдылығын арттыруға оң ықпал етеді.
Жалпы, Шымкентте тұрғын үй құрылысы, әлеуметтік нысандарды жаңғырту және инвестициялық жобаларды қатар дамыту қаланың кешенді дамуына серпін беріп отыр. Бұл жұмыстар мегаполистің заманауи инфрақұрылымын қалыптастырып, халықтың өмір сүру сапасын жақсартумен қатар, өңірдің экономикалық әлеуетін одан әрі нығайтуға мүмкіндік береді.
