Шымкент қаласының Кәсіпкерлер палатасында кәсіпкерлердің цифрлық сауда саласындағы білімін жетілдіруге бағытталған кезекті оқыту вебинары өтті. Бұл жолы бизнес өкілдері әлемдегі ірі онлайн-сауда алаңдарының бірі – Wildberries маркетплейсінде жұмыс істеудің негізгі қағидаларын меңгеріп, электронды коммерция саласындағы тәжірибесін толықтырды.
Вебинардың басты мақсаты – кәсіпкерлерге онлайн сауданың тиімді тетіктерін үйрету, маркетплейстердің мүмкіндіктерін кеңінен таныстыру және өнімді интернет арқылы сатудың заманауи тәсілдерін түсіндіру. Мұндай оқыту бағдарламалары шағын және орта бизнес субъектілерінің цифрлық экономикаға бейімделуіне және жаңа нарықтарға шығуына мүмкіндік береді.
Оқыту курсына 50-ге жуық кәсіпкер қатысты. Бағдарлама барысында қатысушылар маркетплейсте бизнес жүргізудің негізгі кезеңдерімен танысып, өнімді орналастырудан бастап оны тиімді сатуға дейінгі барлық процестер бойынша практикалық білім алды.
Вебинарды сарапшы Рахманбек Мұқышев жүргізіп, кәсіпкерлерге бизнестің қаржылық тиімділігін бағалауда маңызды саналатын юнит-экономиканы есептеу, өнімнің өзіндік құнын анықтау, барлық шығындарды дұрыс жоспарлау және пайда көлемін есептеу тәсілдерін түсіндірді. Сонымен қатар маркетплейсте табысты жұмыс істеу үшін тауар карточкаларын дұрыс рәсімдеу, өнімді іздеу жүйесінде алдыңғы қатарға шығару және жарнаманы тиімді пайдалану жолдары жан-жақты қарастырылды.
Кездесу барысында электронды коммерцияның қазіргі бизнестегі рөліне де ерекше назар аударылды. Мамандардың пікірінше, онлайн платформалар кәсіпкерлерге географиялық шектеусіз жаңа тұтынушыларға шығуға мүмкіндік береді. Бұл әсіресе шағын және орта бизнес үшін өнім өткізу нарығын кеңейтіп, сатылым көлемін арттырудың тиімді құралы саналады.
Вебинарға қатысушылар тәжірибелік мысалдар арқылы маркетплейстегі жұмыс ерекшеліктерін талдап, өздерін қызықтырған сұрақтарға жауап алды. Мұндай оқыту кәсіпкерлерге цифрлық саудадағы тәуекелдерді азайтып, бизнес жүргізудің заманауи тәсілдерін меңгеруге көмектеседі.
Сарапшылардың айтуынша, электронды коммерцияның қарқынды дамуы кәсіпкерлердің жаңа білім мен цифрлық дағдыларды игеруін талап етеді. Сондықтан Кәсіпкерлер палатасы ұйымдастыратын осындай оқыту бағдарламалары бизнес өкілдерінің бәсекеге қабілеттілігін арттырып, ішкі және сыртқы нарықта табысты жұмыс істеуіне мүмкіндік береді.
Шымкентте кәсіпкерлердің цифрлық сауаттылығын арттыруға бағытталған мұндай бастамалар шағын және орта бизнестің дамуына, отандық өнімнің онлайн нарықтағы үлесін көбейтуге және кәсіпкерліктің жаңа бағыттарын қалыптастыруға ықпал етіп келеді.
