Алматы қаласындағы жоғары оқу орындарының бірінде жастардың құқықтық сауаттылығын арттыруға бағытталған кездесу өтті. Іс-шара барысында полиция қызметкерлері студенттермен ашық диалог құрып, отбасылық-тұрмыстық зорлық-зомбылықтың алдын алу, жеке қауіпсіздік және құқықтық жауапкершілік мәселелерін талқылады.
Кездесудің негізгі тақырыптарының бірі – сталкингке қатысты заңнамаға енгізілген жаңа нормалар болды. Қатысушыларға адамның жеке өміріне қол сұғу, аңду, тұрақты түрде мазасын алу, психологиялық қысым көрсету немесе бақылау жасау сияқты әрекеттердің заң бұзушылық болып саналатыны жан-жақты түсіндірілді. Сонымен қатар тұлғааралық қарым-қатынаста кездесетін өзге де құқыққа қайшы әрекеттер үшін көзделген жауапкершілік туралы ақпарат берілді.
Полиция қызметкерлері жастар арасында құқықтық мәдениетті қалыптастырудың маңыздылығына ерекше назар аударды. Мамандардың айтуынша, өз құқықтары мен міндеттерін білетін азаматтар ғана қауіпсіз әрі әділетті қоғам құруға үлес қоса алады. Әсіресе болашақ отбасылық қатынастарда өзара құрмет, сенім және жауапкершілік қағидаттарын сақтау маңызды екені атап өтілді.
Кездесу барысында студенттер өздерін қызықтырған сұрақтарын қойып, нақты өмірлік жағдайлар бойынша құқықтық кеңестер алды. Мұндай профилактикалық іс-шаралар жастар арасында заңға құрметті арттырып, тұрмыстық зорлық-зомбылықтың алдын алуға бағытталған мемлекеттік саясатты тиімді жүзеге асыруға ықпал етеді.
Ұйымдастырушылардың пікірінше, құқықтық сауаттылық пен саналы көзқарас – қауіпсіз қоғам мен берік отбасының негізі.
