2025 жылдың қорытындысы бойынша жаңартылатын энергия көздері нысандарынан өндірілген электр энергиясының көлемі 8,621 млрд кВт.сағ болды. Оның ішінде қолданыстағы шағын және орта су электр станциялары 1,196 млрд кВт.сағ экологиялық таза энергия өндірді.
Жасалған келісімшарттарға сәйкес, 2030 жылдың соңына дейін жалпы қуаты шамамен 660 МВт болатын жаңа су электр станцияларын іске қосу жоспарланып отыр.
Саладағы ашықтықты қамтамасыз ету және инвестиция тарту мақсатында Энергетика министрлігі аукциондық сауда механизмдерін белсенді қолданады. Атап айтқанда, 2025 жылы гидроэнергетика жобалары үшін 500 МВт қуат аукционға шығарылды.
Қолданыстағы ЖЭК нысандарының, соның ішінде су электр станцияларының ең жоғары шоғырлануы елдің оңтүстік және шығыс өңірлерінде байқалады. Көшбасшы аймақтар қатарында Жамбыл, Алматы және Жетісу облысы бар.
Жоспарланған СЭС жобаларын іске асыру Қазақстанның энергетикалық теңгерімін әртараптандыруға мүмкіндік береді. Сонымен қатар, өзендердің табиғи су әлеуетін тиімді пайдалану арқылы шалғай өңірлерді тұрақты «жасыл» энергиямен қамтамасыз етуге мүмкіндік береді.
