Өткен жыл «Әдет-ғұрып пен салт-дәстүр орталығы» үшін мазмұнды әрі маңызды кезең болды. Мекеменің қызметі мәдени мұраны сақтау, ұлттық дәстүрлерді жаңғырту және оларды заманауи қоғамға бейімдеу бағытындағы мемлекеттік саясатты жүзеге асыруға арналды. Орталық ғылыми-ағартушылық жұмысқа және жастарды заманауи форматтар арқылы белсенді тартуға ерекше көңіл бөледі.
Жыл қорытындысы және қызмет ауқымы
2025 жылы Орталық 25 мәдени-ағартушылық іс-шара және 200-ге жуық экскурсия ұйымдастырды. Келушілердің жалпы саны 13 500-ден асты. Негізгі аудитория — жастар мен қандастар. Іс-шаралар аймақтық және республикалық деңгейде өтіп, байқауларды, фестивальдерді, шеберлік сабақтарын және ғылыми-танымдық кездесулерді қамтыды.
Маңызды оқиғалардың бірі — көрнекті ағартушы, қоғам қайраткері Міржақып Дулатұлының туғанына 140 жыл толуына арналған «Ұлтты оятқан ұлы тұлға» атты танымдық шара болды. Баяндамалар мен бейнематериалдар арқылы қатысушыларға оның ел тағдырындағы тарихи рөлі кеңінен таныстырылды.
Дәстүрлер мен ұлттық ойындарды жаңғырту
Орталық ұмыт бола бастаған ұлттық ойындарды насихаттауға ерекше мән береді. Студент жастар үшін асық ату, ләңгі тебу, ханталапай сияқты ұлттық ойындармен интерактивті шаралар ұйымдастырылды. Бұл бастамалар жастар арасында үлкен қызығушылық тудырып, цифрлық тәуелділікке балама мәдени демалыс түріне айналды.
Киіз, қолөнер және қолданбалы өнер
Орталық қызметінің маңызды бағыттарының бірі — көшпелі мәдениеттің бірегей материалы саналатын киізді дәріптеу. Киіз басу, текемет жасау және өңірлік қолөнер ерекшеліктеріне арналған шеберлік сабақтары мен іс-шаралар өткізілді. Шеберлер дәстүрлі технологиялар мен бұйымдардың символдық мәні туралы тәжірибелерімен бөлісті.
Сонымен қатар «Ер-тұрманым — күмістен» атты республикалық шеберлік сабағы ұйымдастырылып, еліміздің түкпір-түкпірінен келген шеберлер ер-тоқым жасау, қамшы өру және күміспен әшекейлеу өнерін паш етті. Жоба ұмыт қалған ұлттық қолөнерді жаңғыртуға және жастардың қызығушылығын арттыруға ықпал етті.
Ұлттық құндылықтар және этносаралық келісім
Орталық этносаралық татулық пен бірлікті нығайту бағытында жүйелі жұмыс жүргізуде. Қаланың түрлі этномәдени бірлестіктері қатысқан байқаулар мен мәдени бағдарламаларда қатысушылар өз дәстүрлерін қазақ мәдениетімен сабақтастыра отырып көрсетті.
Отбасылық құндылықтарды дәріптеуге арналған «Дана ене — тәрбиелі келін» байқауы ерекше танымал болды. Қатысушылар ұлттық салт-дәстүрлерді білуін, аспаздық шеберлігін және отбасындағы сыйластықты танытты.
Салт-дәстүрлер, мерекелер және ұлттық тағамдар
Орталық жыл сайын амал мерекесін — Наурыздың басталуын білдіретін көрісу күнін ұйымдастырып келеді. Сондай-ақ Наурыз-көженің қасиетті мәні мен дайындалу жолдарына арналған шеберлік сабақтары өткізілді.
«Дән мен дәм fest» ұлттық тағамдар фестиваліне шамамен 700 адам қатысып, ұмыт бола бастаған ас түрлерін қайта жаңғыртуға мүмкіндік берді. Ал Төлеби ауданының Диқанкөл ауылында «Қымызмұрындық» дәстүрі қайта жанданып, көктемгі жаңарудың символы ретінде алғаш қымыз ішу рәсімі көрсетілді.
Ауқымды жобалар және әлемдік рекордтар
Орталық жүзеге асырған ең ірі жобалардың бірі — «Аламан құрақ». Елдің барлық өңірінен жиналған 450 шебер бірлесіп, жалпы аумағы 112 000 шаршы метр болатын құрақ көрпе жасап, бұл жетістік Global Book of Records кітабына тіркелді. Кейін Алматы қаласында тағы бір әлемдік рекорд орнатылды.
Ғылыми-ағартушылық миссия
Бүгінде Орталықта 46 қызметкер еңбек етеді. Мекеме бес құрылымдық бөлім арқылы ғылыми-зерттеу жұмыстарын жүргізіп, этнографиялық көрмелер, конференциялар, симпозиумдар ұйымдастырады, сондай-ақ әдістемелік және ағартушылық басылымдар шығарады.
Орталық мамандарының айтуынша, салт-дәстүрді сақтау — өткенге тағзым ғана емес, болашақ ұрпақтың рухани дамуының негізі. Әдет-ғұрып пен салт-дәстүрдің терең мәнін түсіну арқылы мәдениетке, тарихқа және ұлттық болмысқа деген құрмет қалыптасады.
Әдет - ғұрып пен салт-дәстүр орталығының қызметі: Мәдени мұраны сақтау және этномәдени құндылықтарды дамыту
