Алматы қаласында ірі инфрақұрылымдық инвестициялық жобалардың бірі – Евразиялық логистикалық парктің іске қосылуы өңір экономикасы үшін маңызды оқиға болды. Жалпы инвестиция көлемі 16,6 млрд теңгені құрайтын бұл жоба Алматы мен Алматы облысының логистикалық дамуы жөніндегі ұзақ мерзімді стратегиясымен тығыз үндесіп, қаланың халықаралық сауда және көлік жүйесіндегі рөлін күшейтуге бағытталған. Логистикалық орталықтың ашылуы мегаполистің бизнес үшін тартымды алаң ретіндегі мәртебесін одан әрі нығайта түсті.
Еуразиялық логистикалық парк «Шығыс қақпалары» полицентрінде орналасып, осы аумақта іске қосылған алғашқы ірі қойма кешені атанды. Бұл аймақ Алматы агломерациясының экономикалық өсу нүктелерінің бірі ретінде қарастырылады. Жобаның дәл осы жерде жүзеге асырылуы кездейсоқ емес, себебі полицентр Алматы қаласы мен облыс арасындағы логистикалық байланыстарды күшейтуге және өңірлік сауда ағындарын тиімді басқаруға мүмкіндік береді. Кешеннің іске қосылуы жүк тасымалының жаңа деңгейге көтерілуіне жол ашып отыр.
Логистикалық парк стратегиялық тұрғыдан аса тиімді жерде – халықаралық көлік дәлізіне кіретін Күлджин трактінің бойында салынған. Бұл аумақтан БАКАД көлік торабына дейінгі қашықтық небәрі 5 шақырымды құрайды, Алматы халықаралық әуежайына дейін 20 шақырым, ал қала орталығына шамамен 35 минутта жетуге болады. Мұндай географиялық орналасу жүк ағындарын жылдам бағыттауға, транзит уақытын қысқартуға және логистикалық шығындарды төмендетуге мүмкіндік береді.
Еуразиялық логистикалық парктің жалпы ауданы 50,3 мың шаршы метрді құрайтын екі корпустан тұрады. Қойма кешені заманауи қауіпсіздік жүйелерімен, инженерлік инфрақұрылыммен және қызметкерлерге арналған барлық қажетті жағдайлармен жабдықталған. Бұл нысан Қазақстандағы А класындағы ең ірі қоймалардың бірі ретінде бағаланып отыр. Сарапшылардың пікірінше, мұндай сападағы қойма алаңдарының іске қосылуы елде ұзақ уақыт бойы сезіліп келген заманауи логистикалық инфрақұрылым тапшылығын азайтады.
Жобаны жүзеге асыруға халықаралық және қазақстандық компаниялар тартылды. Девелопер ретінде сапалы қойма активтерін дамытуға маманданған Aurora Development компаниясы жұмыс атқарды. Инвестор және құрылтайшы Sudakov Group болса, бас мердігер қызметін RAMS International құрылыс компаниясы атқарды. Қаржыландырудың негізгі бөлігін Евразиялық даму банкі қамтамасыз етіп, 16,6 млрд теңге көлемінде несие бөлді. Бұл жобаның халықаралық қаржы институттары тарапынан қолдау тапқанын көрсетеді.
Логистикалық орталықтың іске қосылуы электрондық сауда нарығының қарқынды дамуымен тікелей байланысты. Қазақстанда e-commerce үлесі 2024 жылы бөлшек сауданың 14,5 пайызына жетіп, 2021 жылмен салыстырғанда алты есеге артты. Онлайн сауданың өсуі жылдам әрі сенімді жеткізуге деген сұранысты күшейтіп, сапалы қойма инфрақұрылымының маңызын арттырды. Осы тұрғыда Евразиялық логистикалық парк онлайн сауда компаниялары мен бөлшек сауда желілері үшін маңызды логистикалық хабқа айналып отыр.
Сарапшылардың болжамына сәйкес, 2030 жылға қарай Қазақстанда заманауи қойма алаңдарына деген жиынтық сұраныс 4,5 млн шаршы метрге жетуі мүмкін. Бұл көрсеткіш логистикалық инфрақұрылымға инвестиция салудың экономикалық негізділігін дәлелдейді. ЖІӨ мен халық табысының өсуі бөлшек сауда көлемін ұлғайтып, логистика саласының дамуына қосымша серпін беріп отыр.
Еуразиялық логистикалық парк аясында стратегиялық серіктестіктер де қалыптасуда. Ашылу рәсімі барысында NOYTECH компаниясымен ынтымақтастық туралы келісімге қол қойылды. Сонымен қатар инвесторлар Күлджин трактісі бойымен логистикалық паркті кеңейтіп, Алматыда 300 мың шаршы метрге дейін қойма жылжымайтын мүлкін салуды жоспарлап отыр. Бұл жоспарлар Алматыны Орталық Азиядағы ірі логистикалық орталықтардың біріне айналдыруға бағытталған.
Жалпы алғанда, Евразиялық логистикалық парктің іске қосылуы Алматының көлік-логистикалық инфрақұрылымын жаңа деңгейге көтеріп, қаланың транзиттік, сауда және инвестициялық әлеуетін күшейтіп отыр.
