Алматы қаласында қысқы туристік маусым ресми түрде басталып, қала тағы да жыл бойы туристерді тартатын ірі орталық ретіндегі мәртебесін нығайтып отыр. Соңғы жылдары мегаполиске келушілердің таулы аймақтарға деген қызығушылығы маусымға тәуелсіз тұрақты сипатқа ие. Бұған Іле Алатауы мен оның маңындағы табиғи нысандарға келушілер санының тұрақты өсуі дәлел. 2025 жылдың қаңтар-қараша айлары аралығында Іле-Алатау ұлттық саябағына жүздеген мың адам келген. Ал Shymbulak тау курортына келушілер саны да жоғары деңгейде сақталып отыр, оның ішінде жаз айларындағы туристер ағыны ерекше назар аудартады.
Қыс мезгілінде Алматыдағы басты туристік нысан саналатын Shymbulak тау-шаңғы курорты жаңа маусымын 6 желтоқсанда ресми түрде ашты. Курорт Орталық Азиядағы ең танымал тау демалысы бағыттарының бірі ретінде танылып келеді. Өткен маусымда мұнда келушілер саны миллионнан асып, Shymbulak халықаралық деңгейде жоғары бағаланды. Бірқатар беделді басылымдар курортты әлемдегі үздік тау-шаңғы бағыттарының қатарына қосты. Бұл Алматының экотуризм мен белсенді демалыс саласындағы әлеуетін көрсетеді.
Жаңа қысқы маусымда Shymbulak туристер үшін мүмкіндіктер аясын кеңейтуде. Қазіргі таңда бірнеше негізгі трасса ашылып, келушілерді қабылдап жатыр. Ауа райы қолайлы болған жағдайда қосымша беткейлер мен түнгі сырғанау алаңдары кезең-кезеңімен іске қосылады. Сонымен қатар курорт аумағында демалыс пен спортты ұштастыратын түрлі форматтағы іс-шаралар жоспарланған. Бұл таудағы уақытты тек спортпен ғана емес, мәдени және демалыс тұрғысынан да мазмұнды өткізуге мүмкіндік береді.
Алматыға шетелдік туристер санының артуы да қысқы маусымға деген қызығушылықты күшейтіп отыр. Осыны ескере отырып, Shymbulak инфрақұрылымы, қызмет көрсету сапасы және ұзаққа созылатын шаңғы маусымы арқылы қонақтарды қабылдауға толық дайын. Бұл қаладағы экологиялық туризмді дамытуға және таулы аймақтардың әлеуетін тиімді пайдалануға ықпал етеді.
