Түркістан облысына қарасты Сауран ауданында Қытай Халық Республикасының Шыңжаң ұйғыр автономиялық районы құрамындағы Сауан қаласының ресми делегациясымен маңызды кездесу өтті. Бұл басқосу екі өңір арасындағы экономикалық, өндірістік, мәдени және әлеуметтік ынтымақтастықты нығайтуға бағытталып, өзара тиімді әріптестікті жаңа деңгейге көтеру мәселелерін талқылауға арналды. Халықаралық байланыстарды кеңейтуге басымдық берілген кездесуде Сауран ауданының даму мүмкіндіктері жан-жақты таныстырылып, шетелдік қонақтарға өңірдің өндірістік әлеуеті көрсетілді.
Кездесу барысында Сауран ауданының әкімі Мақсат Таңғатаров екі өңір арасындағы серіктестіктің маңыздылығына тоқталып, экономикалық байланыстарды дамытуға аудан әкімдігі толық дайын екенін атап өтті. Ол Сауран ауданының ауыл шаруашылығы, өнеркәсіп, инфрақұрылым және кәсіпкерлік салаларында ашық мүмкіндіктер бар екенін айтып, шетелдік инвесторлармен бірлескен жобаларды жүзеге асыруға қолайлы жағдай жасалғанын жеткізді. Аудан басшысы өз сөзінде халықаралық ынтымақтастық өңірдің әлеуметтік-экономикалық дамуына серпін беретінін, жаңа жұмыс орындарының ашылуына және өндірістің кеңеюіне ықпал ететінін атап өтті.
Сауран ауданының инвестициялық және туристік әлеуеті туралы аудан әкімдігінің кәсіпкерлік және туризм бөлімінің басшысы Сұлтанғали Шакиров кеңінен баяндады. Ол өңірдегі индустриялық аймақтар, өндірістік парктер, бизнес жүргізуге қолайлы инфрақұрылым және туризм саласындағы жаңа бағыттар жөнінде нақты ақпарат берді. Сонымен қатар аудан аумағында іске асырылып жатқан және болашақта жүзеге асуы мүмкін жобалар таныстырылып, Сауранның транзиттік және өндірістік мүмкіндіктері шетелдік тарапқа ұсынылды.
Қытай Халық Республикасының Сауан қаласының әкімі Ербол Төлегенұлы сөз алып, Сауран ауданының әлеуетін жоғары бағалады. Ол екі өңір арасындағы мәдени-гуманитарлық және экономикалық байланыстарды кеңейтуге ниетті екенін білдіріп, бірлескен жобаларды іске асыруға қызығушылық танытты. Делегация басшысы өз сөзінде Қазақстан мен Қытай арасындағы өңіраралық ынтымақтастықтың маңызы артып келе жатқанын айтып, Сауран ауданымен әріптестік орнату екі тарап үшін де тиімді болатынын жеткізді.
Ресми кездесу барысында ауыл шаруашылығы, өндіріс, туризм, инфрақұрылым және әлеуметтік жобалар бағытында өзара ұсыныстар талқыланды. Тараптар бірлескен жобаларды жүзеге асырудың мүмкін жолдарын қарастырып, болашақ ынтымақтастықтың негізгі бағыттарын нақтылады. Жиын соңында қатысушылар кездесудің нәтижелі өткенін атап өтіп, екіжақты әріптестікті одан әрі дамытуға ниет білдірді.
Кездесуден кейін ҚХР Сауан қаласының делегациясы Сауран ауданының Шаға ауылдық округінде орналасқан өндірістік парк нысандарын аралады. Қонақтарға аудан аумағында жұмыс істеп тұрған кәсіпорындардың қызметі таныстырылып, олардың өндірістік мүмкіндіктері көрсетілді. Бұл сапар шетелдік делегацияға Сауран ауданының индустриялық әлеуетін көзбен көріп, нақты бағалауға мүмкіндік берді.
Делегация мүшелері жаңбырлатып және тамшылатып суару жүйелерін өндіретін «BNK Group» серіктестігінің өндірістік цехтарында болды. Кәсіпорын америкалық «Nelson Irrigation» компаниясымен әріптестік аясында «BNK IRRIGATION» брендімен айналмалы және фронтальды жаңбырлатқыш машиналар шығарады. Бұл заманауи технологиялар ауыл шаруашылығында суды үнемді пайдаланып, өнімділікті арттыруға мүмкіндік береді. Қонақтар өндіріс процесімен танысып, мұндай технологиялардың аймақтық ауыл шаруашылығы үшін маңыздылығын атап өтті.
Сондай-ақ делегация «Aqniet Holding» кәсіпорнының өндіріс алаңында болды. Бұл компания білім беру ұйымдарына арналған жиһаз өндірумен айналысады және соңғы жылдары ондаған мектепті қажетті жабдықтармен қамтамасыз еткен. Қазіргі таңда кәсіпорын «Жайлы мектеп» ұлттық жобасы аясында стандартталған жиһаз үлгілерін шығарып, оларды еліміздің оқу орындарына жеткізіп отыр. Сонымен қатар «Aqniet Holding» «KAZMEDPRIBOR» компаниясымен бірлесіп, денсаулық сақтау саласына арналған медициналық жабдықтар өндірісін жүзеге асыруда.
Қытайлық делегация өкілдері көрсетілген кәсіпорындардың өндірістік мүмкіндіктеріне ерекше қызығушылық танытып, болашақта бірлескен жобаларды іске асыру мүмкіндіктерін талқылады. Шаға ауылдық округіндегі өндірістік парк Сауран ауданының экономикалық әлеуетін, заманауи өндірістерді дамытуға дайын екенін айқын көрсетті. Бұл сапар екі өңір арасындағы ынтымақтастықты нақты іспен нығайтуға бағытталған маңызды қадам болып, алдағы уақытта жаңа бірлескен жобалардың жүзеге асуына негіз қалады.
