Шымкент қаласындағы Қырғы базар аумағында жастарға арналған ақпараттық-түсіндіру іс-шарасы өтті. Кездесу «Ұлттық жоба» шеңберінде ұйымдастырылып, негізгі мақсат ретінде жастарды жұмыспен қамтуға бағытталған мемлекеттік бағдарламалармен таныстыру, олардың еңбек нарығындағы мүмкіндіктерін кеңейту және әлеуметтік белсенділігін арттыру көзделді. Мұндай форматтағы шаралар ресми мекемелерге бара алмайтын немесе ақпараттан тыс қалып жатқан жастармен тікелей байланыс орнатуға мүмкіндік береді.
Іс-шараға Мансап орталығының қызметкерлері Абай Бауыржанұлы Керімбек пен Ердәулет Манарбекұлы Тұрдалы, сондай-ақ «Жастар ресурстық орталығы» КММ-нің мамандары Әсел Төребек Жаңабайқызы мен Хансұлтан Бакиров қатысты. Олар базар аумағында еңбек етіп жүрген немесе уақытша жұмыс істеп жүрген жастармен жеке-жеке сөйлесіп, мемлекеттік қолдау тетіктері жөнінде жан-жақты ақпарат ұсынды.
Кездесу барысында жастарға жұмыспен қамтудың белсенді шаралары түсіндірілді. Атап айтқанда, «Жастар практикасы» бағдарламасының мәні, оған қатысу шарттары, оқу орнын жаңа тәмамдаған түлектер үшін беретін мүмкіндіктері кеңінен айтылды. Сонымен қатар «Алғашқы жұмыс орны» жобасы арқылы еңбек өтілі жоқ жастардың ресми жұмысқа орналасуына жол ашылатыны, бұл кезеңде мемлекет тарапынан жалақыны субсидиялау тетіктері бар екені түсіндірілді.
Жастарға уақытша табыс табуға және еңбек дағдысын қалыптастыруға мүмкіндік беретін «Қоғамдық жұмыс» бағдарламасы туралы да нақты ақпарат берілді. Мамандар бұл жобаның тек қаржылық қолдау емес, еңбек тәртібін үйрену мен тәжірибе жинақтауға бағытталғанын атап өтті. Сонымен бірге кәсіпкерлікке оқыту курстары, жаңа мамандықтарды игеру мүмкіндіктері және өз ісін бастауға дайын жастарға көрсетілетін қолдау шаралары жөнінде де мәліметтер ұсынылды.
Іс-шара барысында қатысушыларға арнайы дайындалған жадынамалық парақшалар таратылып, онда бағдарламаларға қатысу жолдары, қажетті құжаттар тізімі және жауапты мекемелердің байланыс деректері көрсетілді. Жастар өздерін қызықтырған сұрақтарын қойып, нақты жағдайлар бойынша жеке кеңес алу мүмкіндігіне ие болды. Әсіресе ресми жұмысқа тіркелу, еңбек өтілін қалыптастыру және Enbek.kz платформасы арқылы қызметтерді пайдалану тақырыптары көпшіліктің қызығушылығын тудырды.
Ұйымдастырушылардың айтуынша, мұндай ақпараттық жұмыстардың маңызы зор. Себебі көптеген жастар мемлекеттік бағдарламалар туралы толық білмегендіктен, өздеріне арналған мүмкіндіктерді пайдалана алмай жатады. Ал базарлар мен адам көп шоғырланатын орындарда өткізілетін кездесулер осы олқылықтың орнын толтыруға көмектеседі.
Алдағы уақытта да Шымкент қаласының әртүрлі аумақтарында жастарға арналған осындай түсіндіру жұмыстары жалғасады. Негізгі мақсат – әрбір жастың еңбек етуге, білім алуға және өз әлеуетін іске асыруға мүмкіндік беру, сондай-ақ олардың қоғамдағы белсенді рөлін күшейту.
