Қала тұрғындарының үйлеріне жылу жеткізу – үлкен жауапкершілікті талап ететін сала. Осы күрделі жұмыстың басы-қасында жүріп, өз ісіне адалдықпен қарайтын еңбек адамдарын ерекше құрметтеуге болады. Солардың бірі – Шымкент қаласындағы «Қуатжылуорталық-3» мекемесінде абыроймен еңбек етіп келе жатқан 5-дәрежелі слесарь Бекенов Ғалымжан Маханұлы. Ол техникалық мамандыққа деген қызығушылығын еңбекпен ұштастырып, жылдар бойы кәсіби өсудің биігіне жетіп келе жатқан жан.
Бекенов Ғалымжан Маханұлы 1974 жылдың 15 сәуірінде Шымкент қаласында дүниеге келген. Орта мектепті 1992 жылы аяқтаған соң, жас маман еңбек жолына ерте араласып, нақты тәжірибе жинауға ұмтылды. Техникалық саладағы шынайы қызығушылығы оны жылу энергиясы бағытындағы қызметке алып келді.
2002–2003 жылдары «Энергоцентр-3» акционерлік қоғамында жылу бекеттеріне қызмет көрсететін 3-дәрежелі слесарь ретінде алғашқы кәсіби қадамын жасады. Әр істі тиянақтылықпен орындап, қысқа мерзім ішінде сенімге ие бола білді. Сол себепті 2003–2004 жылдары «Жылуэнергоорталық» ЖШС-де осы дәрежедегі слесарь қызметін жалғастырып, өндірістік тәжірибесін кеңейте түсті.
Ал 2004–2015 жылдары «3-Энергоорталық» АҚ құрамында слесарь әрі сорғы қондырғыларының машинисі ретінде еңбектенді. Бұл кезең оның кәсіби тұрғыдан шыңдалған, техникалық білімін жетілдірген жылдар болды. Қыстың қақаған күндері апаттық жағдайға жедел әрекет ету, тұрғындарға жылудың үзілмей жетуін қамтамасыз ету – бұл қызметтің басты міндеті. Ғалымжан Маханұлы осы талаптарды әрдайым жоғары деңгейде орындап отырды.
2015 жылдан бастап «Қуатжылуорталық-3» мекемесінің №1 аудандық бөлімшесіне жұмысқа қабылданып, сорғы қондырғыларының 3-дәрежелі машинисі болды. Тәжірибесі мен еңбектегі ұқыптылығының арқасында аз уақыт ішінде кәсіби сатылардан өтіп, бүгінде апаттық-диспетчерлік қызметке қарасты жылу желілеріне қызмет көрсететін 5-дәрежелі слесарь ретінде еңбек етуде.
Бұл қызмет сырт көзге көрінбегенімен, қала өмірінің ең маңызды тірегі. Егер жылу жүйесінде апат пайда болса, бірінші болып сол жерге жететін де — Ғалымжан сынды мамандар. Олар үшін күн де, түн де, мереке де, демалыс та жоқ. Басты мақсат – тұрғындарға жылу үзілмей жетуі.
Әріптестері Ғалымжанды сабырлы мінезі, өз ісіне деген адалдығы және қауіпсіздік талаптарын қатаң сақтауы үшін ерекше бағалайды. Жас мамандарға бағыт-бағдар беріп, оларды техникалық салаға қызықтыруға үлес қосып келеді. «Жауапкершілік – мамандықтың негізі» деген өмірлік ұстанымы оның әр жұмысынан байқалады.
Отбасында да ол – қамқор әке, сүйікті жар. Балаларына еңбекпен келетін табыс пен адалдықтың мәнін үлгі етуге тырысады.
Бекенов Ғалымжан Маханұлы – кәсіби шеберлігімен, тәртіпке берік болмысымен, ел игілігі үшін тер төгіп жүрген еңбек адамы. Оның өмір жолы – табандылық пен қажырлы еңбектің, жауапкершілік пен техникалық шеберліктің айқын көрінісі.
Осындай азаматтардың арқасында шаһарымызда жылу жүйелері тұрақты жұмыс істеп, тұрғындардың үйлері жылы, өмірі жайлы болуда. Еңбегі елене берсін, абыройы арта берсін!
