«Инвестициялық әлеуетімізді ескере отырып, облыс экономикасының дамуына тың серпін беретін 2,6 трлн теңгеге 111 инвестициялық жоба пулын қалыптастырдық. Өңдеу, энергетика және ауыл шаруашылығын терең қайта өңдеу негізгі басымдықтар болып айқындалды», – деді спикер.
Жобаларды іске асыру нәтижесінде 24 мыңға жуық жұмыс орны ашылып, бюджетке қосымша 100 млрд теңге салық түседі. Биыл 340 млрд теңгеге 58 жобаны іске асырып, 8 мыңнан астам жұмыс орнын ашу жоспарланған. 10 айда 41 жоба іске қосылып, 5 мыңнан астам жұмыс орны ашылды. Аталған бағытта атқарылған жұмыстардың нәтижесінде 10 айда өңір экономикасына 1,2 трлн теңге инвестиция тартылып, өсім 124%-ды құрады.
Мемлекет басшысы туризм саласының халықаралық имиджді қалыптастырудағы маңызды рөлін атап өтті. Түркістан облысында бұл сектор қарқынды дамып келеді. Президент қолдауымен Түркістан қаласына ерекше мәртебе берілуі өңірдің туристік әлеуетін жаңа деңгейге көтерді.
Жыл басынан бері 500 мыңнан астам турист өңірге келіп, 6,6 млрд теңге табыс түсті. Туристерге жаңа бағыттар мен өнімдер ұсыну мақсатында ауқымды жобалар жүзеге асырылып жатыр. Атап айтқанда, Түркістан қаласында Есу арнасы каналы мен Қолөнершілер орталығының құрылысы аяқталды. 99 гектар аумақты қамтитын «Ипподром» құрылысы аяқталуда. Келесі жылдың басында пайдалануға беріледі. Аталған нысандар халықаралық деңгейдегі іс-шараларды ұйымдастыруға мүмкіндік береді.
