Адал еңбек – адамның ең үлкен байлығы. Осы қағиданы өмірлік ұстанымына айналдырған азаматтардың бірі – Қожамқұлов Шерхан Курманғазыұлы. Ол 1989 жылдың 26 маусымында Бәйдібек ауданының Қошқар ата ауылында дүниеге келіп, жастайынан еңбекқорлық пен жауапкершілікті бойына сіңіріп өсті.
Білім жолын 1995–2006 жылдары Шымкент қаласындағы Мұқами атындағы №13 орта мектепте бастады. Мектеп қабырғасында жүріп, қоғамдық жұмыстарға белсенді араласып, көшбасшылық қабілетін танытты. Білімін жетілдіру мақсатында Оңтүстік Қазақстан педагогикалық университетінде «Экономика және бизнес» мамандығын меңгеріп, жоғары білім иесі атанды. Бұл мамандық оның болашақта ұйымдастырушылық қабілетін арттыруға, басқару саласында өз орнын табуға жол ашты.
Еңбек жолын 2012 жылы «Служба сервиса ВКХ» жауапкершілігі шектеулі серіктестігінде слесарь қызметінен бастады. Жас маман ретінде ол практикалық дағдыларын жетілдіріп, өндірістік процестерді терең түсіне бастады. Қарапайым жұмыс орнында жүріп-ақ ұқыптылығы мен тиянақтылығымен ерекшеленді.
Кәсіби мүмкіндігін кеңейту мақсатында 2014–2016 жылдары «Су арнасы» ЖШС-де геодезист-монометр қызметін атқарды. Бұл кезеңде ол инженерлік жүйелерді бақылау, өлшеу және картаға түсіру сияқты күрделі міндеттерді орындап, білімін іс жүзінде шыңдады.
2017–2019 жылдар аралығында «Торлан Құрылыс» ЖШС-де учаске шебері лауазымында қызмет етіп, құрылыс және инженерлік желілер саласындағы ұйымдастырушылық тәжірибесін арттырды. Командалық басқару, жоспарлау, қауіпсіздік талаптарын қамтамасыз ету сынды маңызды функцияларды абыроймен орындады.
2020 жылдың наурыз айынан бастап Шымкент қаласы әкімдігінің «Су құбыры және канализация басқармасы» мемлекеттік коммуналдық кәсіпорнында шебер қызметін атқара бастады. Өз ісіне ұқыптылығы, бастамашылдығы және кәсіби білімінің арқасында бүгінде учаске басшысы лауазымына көтерілді. Бұл – уақытпен келген жетістік те емес, сыртқы қолдаудың нәтижесі де емес. Бұл – маңдай термен, үздіксіз ізденіспен, табанды еңбекпен келген абырой.
Шерхан Қожамқұлов басқаратын учаскеде күні-түні атқарылып жатқан жұмыстар – қаланың тыныс-тіршілігінің ажырамас бөлігі. Құбыр жарылысы, апатты жағдайларды қалпына келтіру, инженерлік желілердің үздіксіз жұмысын қамтамасыз ету – оның жетекшілігін талап ететін маңызды міндеттер. Әріптестері Шерханды талапшыл, әділ, сабырлы басшы ретінде ерекше құрметтейді.
Отбасылық өмірінде де үлгілі азамат. 2021 жылы Баратова Әсел Құттыбекқызымен отбасын құрып, шаңырақ шаттығын бірге көтеріп келеді. Жастарға тән еңбекқорлық пен болашаққа деген сенімділік — олардың отбасылық құндылықтарының негізі.
Шерхан Қожамқұлов – қарапайым слесарь қызметінен учаске басшысы деңгейіне дейін көтерілген, еңбегімен бедел жинаған азамат. Оның өмір жолы – табандылықтың, үздіксіз дамудың және кәсібіне деген адалдықтың жарқын көрінісі.
Осындай азаматтар – қоғамның тірегі, еңбектің қадірін түсіндіретін нағыз үлгі. Еңбекқор жанның жетістігі – ел ертеңіне қосылған үлес.
