Қаланың тыныс-тіршілігі тек көзге көрінетін үлкен жобалармен немесе ресми шаралармен ғана өлшенбейді. Күн сайын адал еңбегімен қоғамдық қызметтің үздіксіз орындалуына үлес қосып жүрген қарапайым, бірақ қадірлі азаматтар бар. Солардың бірі – Шымкент қаласындағы «ТТК» ЖШС-нің өндіріс басшысы, өз ісінің білікті маманы Фахритдин Юлдашевич Улиходжаев.
1965 жылы Шевченко елдімекенінде дүниеге келген Фахритдин Юлдашұлы жастайынан еңбекке деген құрметті бойына сіңіріп өсті. Ол әр істі соңына дейін жеткізу, жауапкершілікпен қарау және адамдарға құрмет көрсету қағидаттарын өзіне өмірлік бағдар етті. Алғашқы еңбек жолын шин зауытында бастап, қарапайым жұмысшыдан ауысым басшысына дейін көтерілді. Осы кезеңде ол өндіріс процесінің қыр-сырын меңгеріп қана қоймай, үлкен ұжыммен жұмыс істеудің жауапкершілігін түсінді.
Уақыт өте оның тағдыры қаланың көлік саласымен тығыз байланысты болды. Ол қоғамдық көліктің дамуына ширек ғасырдан астам уақытын арнады. Жаңа бағыттардың ашылуына, жолаушыларға тұрақты әрі сапалы қызмет көрсетілуіне, қауіпсіздіктің күшеюіне тікелей үлес қосты. Фахритдин Юлдашұлы үшін автобус жүргізу жай ғана мамандық емес еді. Бұл – қала тұрғындарының белгіленген жерге қауіпсіз жетуін қамтамасыз ету, олардың күнделікті өмірін жеңілдету, қызмет көрсету мәдениетін қалыптастыру жолындағы үлкен еңбек болатын.
Оның сабырлы мінезі мен талапшылдығы әріптестері тарапынан ерекше құрметке ие. Әріптестері Фахритдин мырзаны ұстаз әрі ақылшы ретінде бағалайды. Ол өз тәжірибесін жас мамандарға үйретуден ешқашан жалыққан емес. Жастарға бағыт-бағдар беріп, кәсіби жолдың қыр-сырын көрсетіп, олардың білікті маман болып қалыптасуына ықпал етіп келеді. Сол себепті оның жанында әрдайым ортақ мақсатқа біріге алатын ынталы қызметкерлер тобы қалыптасады.
Бүгінде Фахритдин Улиходжаев «ТТК» ЖШС-нің өндіріс басшысы ретінде жауапты қызмет атқарып келеді. Оның тәжірибесі мен ұйымдастырушылық қабілеті қоғамдық көлік қозғалысының тұрақтылығын қамтамасыз етуге, қаланың көлік инфрақұрылымын дамытуға үлкен үлес қосуда. Жолаушылардың қауіпсіздігі мен қолайлылығын қамтамасыз ету – оның күнделікті міндеттерінің бірі.
Отбасы – Фахритдин Юлдашұлы үшін ең басты қуат көзі. Жұбайымен бірге төрт перзент тәрбиелеп, бүгінде үш немеренің нағашы атасы болып отыр. Ол үшін ең үлкен қуаныш – балаларының тәрбиелі, білімді болып өсіп, өмірде өз жолын табуы. Отбасындағы сыйластық пен бірлік – оның өмірлік құндылықтарының негізі.
Еңбегі еленіп, Қазақстан Республикасының Президентінің Жарлығымен мерейтойлық медальмен марапатталуы – оның көп жылғы табанды қызметінің лайықты бағасы. Алайда өзі үшін ең қымбат марапат – жолаушылардың алғысы мен әріптестерінің шынайы құрметі екенін айтады.
Фахритдин Улиходжаевтың еңбек жолы – даңғаза сөзсіз, бірақ үлкен өнеге мен мағыналы еңбектен тұратын өмір. Адалдық, қарапайымдық және жауапкершілік арқылы ол күн сайын айналасына жақсылық жасап келеді. Осындай азаматтар – қаланың тірегі, қоғамның мерейі. Еңбекке деген құрмет осы жандардан басталады.
