Түркістан облысында халық санының өсуі, жаңа кәсіпорындардың ашылуы және инфрақұрылымның кеңеюі энергия тұтыну көлемінің артуына себеп болуда. Осыған байланысты өңірде энергетикалық жүйелерді жаңарту, электр қуатының үзіліссіз берілуін қамтамасыз ету және тұтынушыларға қолайлы жағдай жасау бағытында ауқымды жұмыстар атқарылып келеді. Бұл бағыттағы міндеттерді жүйелі орындау облыс басшылығының тікелей бақылауында.
Облыс әкімі Нұралхан Көшеров «Оңтүстік жарық транзит» ЖШС басшылығымен өткізген жұмыс кездесуі осы саладағы түйткілді мәселелерді шешуге арналды. Әкім өңірде апатты жағдайда жиі жарық сөніп қалатын аумақтардың нақты картасын әзірлеуді, бұл нүктелерді бақылауға алып, кезең-кезеңімен жаңғыртуды тапсырды. Бұл қадам – халықтың тұрмыстық жағдайын жақсартуға және кәсіпкерлік субъектілерінің үздіксіз жұмысын қамтамасыз етуге бағытталған.
Энергетикалық инфрақұрылымды дамыту аясында 2025–2026 жылдарға арналған жылыту маусымына дайындық жұмыстары басталып кетті. Әкім әлеуметтік нысандар мен тұрғын үйлерді жылу және жарықпен тұрақты қамтамасыз ету – ең басты міндеттердің бірі екенін баса айтты. Облыс аумағындағы тозығы жеткен желілер мен трансформаторлар, жүктемені көтере алмайтын нүктелер түгелдей есепке алынып, арнайы жобалар аясында жөндеуден өтеді.
Кездесу барысында «Оңтүстік жарық транзит» компаниясының өкілдері де өз тарапынан баяндама жасап, қазіргі таңда іске асырылып жатқан инвестициялық жобалар туралы хабарлады. Компанияның мәліметінше, жыл сайын энергетикалық желілер ретке келтіріліп, заманауи қондырғылармен алмастырылып жатыр. Бұл жұмыс жүйелі түрде жалғасып, өңірдегі электр қуатына деген сұранысты тұрақты өтеуге мүмкіндік береді. Сонымен қатар компания алдағы уақытта цифрлық бақылау жүйесін кеңінен енгізіп, желілердегі ақауларды жедел анықтауға жағдай жасауды көздеп отыр.
Түркістан облысында жаңадан ашылып жатқан зауыттар мен өндіріс орындарының да электр қуатына деген сұранысы артып келеді. Бұл — облыстың индустриялық әлеуетінің артқанын білдіреді. Мәселен, алдағы жылы іске қосылатын бірнеше ірі өндірістік нысандарға алдын ала қуат көздерін тарту жоспарланған. Осы бағытта жергілікті билік пен энергетикалық компаниялар өзара тығыз әрекеттесіп, жүктемені есептеп, инфрақұрылымды алдын ала дайындауда.
Облыстағы энергия тиімділігіне де ерекше көңіл бөлінуде. Қазіргі таңда Түркістан қаласының өзінде 37 мыңнан астам жарықтандыру нүктесі жұмыс істейді. Оның басым бөлігі – энергия үнемдейтін шамдар. Қала көшелеріндегі жарықтандыру автоматты жүйемен басқарылады. Бұл жүйе жарықшамдардың жұмысын нақты уақытпен үйлестіріп, электр қуатын үнемдеуге мүмкіндік береді. Жаңа көшелер мен ішкі орамдарға қосымша шамдар орнатылып, жарықтандыру желісі кеңейтіліп жатыр.
Сонымен қатар облыста «Жасыл энергетика» қағидаттарына көшу бағытындағы жұмыстар да қатар жүргізілуде. Болашақта күн және жел электр станцияларын салу мүмкіндігі қарастырылып отыр. Бұл жобалар өңірдің энергетикалық тәуелсіздігін нығайтып қана қоймай, экологиялық қауіпсіздікке де оң әсер етеді.
Қорыта айтқанда, Түркістан облысы энергетикалық инфрақұрылымды жаңғырту және дамыту арқылы әлеуметтік және экономикалық өсімді қамтамасыз етуді басты мақсат етіп отыр. Электр қуатының үздіксіз берілуі – тұрғындардың әл-ауқаты мен кәсіпкерлік бастамалардың табысты жүзеге асуының кепілі. Облыс әкімдігі мен сала мамандарының үйлесімді жұмысы нәтижесінде алдағы жылдары Түркістан өңірі сенімді, заманауи және тұрақты энергетикалық инфрақұрылыммен толық қамтамасыз етіледі деп күтілуде.
