Шымкент қаласында отбасы институтын нығайту мен әйелдердің әлеуметтік және медициналық құқықтарын қорғауға бағытталған маңызды іс-шара өтті. «AMANAT» партиясының Шымкент қалалық филиалында «Әйел аманаты» жобасы аясында ұйымдастырылған семинар жастардың репродуктивті денсаулығын сақтау және салауатты жүктілікті жоспарлау тақырыбына арналды.
Жиынға қалалық партия филиалы жанындағы Әйелдер қанатының жетекшісі Наргиза Керимбаева модераторлық етті. Ол өз сөзінде қоғамдағы әйелдің рөлі мен аналық жауапкершіліктің маңызын атап өтіп, жобаның негізгі мақсаты – әйелдердің денсаулығын қорғау арқылы мықты отбасын қалыптастыру екенін айтты. «Әйел аманаты» жобасы – ананың саулығын қоғамның тұрақтылығы мен ұлт болашағының негізі деп таныған маңызды бастама.
Семинар барысында жоғары санаттағы медицина мамандары – гинеколог-эндокринолог Наталья Рыкова мен акушер-гинеколог, пренатолог Жамиля Алиева дәрістер өткізді. Олар 18 бен 25 жас аралығындағы қыздар мен жас әйелдерге репродуктивті денсаулықты сақтау, дұрыс тамақтану, жеке гигиена, салауатты өмір салты және жоспарлы жүктіліктің маңызы туралы жан-жақты түсіндірме жасады. Медицина мамандары қыз-келіншектерге нақты кеңестер беріп, қатысушылардың сұрақтарына толық жауап берді.
Семинардың тағы бір маңызды бағыты – еңбек ұжымдарындағы әйелдердің құқықтарын қорғау мәселесі болды. Бұл тақырып төңірегінде «Шымкент қаласы кәсіподақтар орталығы» аумақтық кәсіподақтар бірлестігінің төрағасы Бауыржан Алтеев сөз сөйледі. Ол кәсіподақтардың жұмыс істейтін әйелдерге көрсетіп отырған әлеуметтік қолдау шаралары туралы айтып өтті. Төраға өз баяндамасында әйелдердің еңбек ету мен отбасылық өмір арасындағы тепе-теңдікті сақтау, декреттік демалыс пен медициналық сақтандыру құқықтарын қамтамасыз ету мәселелеріне ерекше тоқталды. «Әйелдердің еңбегі мен денсаулығын қорғау – бұл кәсіподақтардың басты міндеттерінің бірі. Біз тек еңбек құқығын ғана емес, аналық құқық пен отбасылық құндылықтарды да қорғауға тиіспіз», – деді Б. Алтеев.
Кездесуге қатысушылардың пікірінше, мұндай семинарлар қоғамдағы отбасы институтын нығайтуға, жас буынның денсаулық мәдениетін қалыптастыруға және әйелдердің өз құқықтарын білуіне үлкен мүмкіндік береді. Әсіресе, медициналық ақпарат пен құқықтық түсіндірудің үйлесімі жастар үшін пайдалы тәжірибе болды.
Шара соңында қатысушылар әйелдердің денсаулығын сақтау, отбасылық құндылықтарды дәріптеу және еңбек саласындағы тең мүмкіндіктерді қамтамасыз ету бағытында осындай кездесулерді тұрақты өткізу қажеттігін атап өтті.
«Әйел аманаты» жобасы – мықты отбасы мен дені сау ұрпақ тәрбиелеуге арналған ортақ міндеттің көрінісі. Ал Шымкент қаласында өткен бұл семинар әйелдерге қамқорлық көрсетудің, әлеуметтік әділдік пен қоғамдағы рухани құндылықтарды сақтаудың нақты үлгісі болды.
