5 қазан – елімізде ерекше құрметпен аталып өтетін кәсіби мереке – Ұстаздар күні. Бұл күн – жас ұрпаққа білім мен тәрбие беріп, елдің болашағын қалыптастыруда маңызды рөл атқаратын педагогтарға деген алғыс пен ризашылықтың белгісі. Осындай атаулы күнге орай Шымкент қаласында «Ұстаз – ұлттың шамшырағы» атты салтанатты іс-шара ұйымдастырылды.
Шараға Шымкент қаласының әкімі Ғабит Сыздықбеков қатысып, ұстаздар мен ардагер педагогтарды кәсіби мерекелерімен құттықтады. Әкім өз сөзінде ұстаз еңбегінің қоғамдағы маңызын айрықша атап өтті. «Мұғалім – мемлекеттің адами капиталын қалыптастыратын басты тұлға. Ұстаздың еңбегі – ұлт болашағының негізі» деп, педагогтердің мәртебесін көтеру мен әлеуметтік жағдайын жақсартуға мемлекет тарапынан ерекше көңіл бөлініп отырғанын айтты.
Салтанатты жиын барысында білім беру саласына сүбелі үлес қосқан ұстаздар түрлі марапаттарға ие болды. Бірқатар мұғалімдерге «Еңбек ардагері» медалі, «Ы. Алтынсарин» және «Білім беру ісінің құрметті қызметкері» төсбелгілері, сондай-ақ Шымкент қаласы әкімінің Алғыс хаттары табысталды. Бұл марапаттар педагогтардың қажырлы еңбегіне берілген жоғары баға әрі олардың кәсібіне деген құрметтің көрінісі болды.
Қала басшысы өз сөзінде ұстаз мәртебесін арттыру – ел дамуының стратегиялық бағыты екенін ерекше атап өтті. Соңғы жылдары мемлекет тарапынан білім беру жүйесін жаңғыртуға, мұғалімдердің кәсіби дамуын қолдауға және еңбекақысын арттыруға бағытталған кешенді шаралар қабылдануда. Бұл саясат ұстаз еңбегінің қоғамдағы беделін күшейтіп, жастардың педагогикалық мамандыққа қызығушылығын арттыруға мүмкіндік беріп отыр.
Шымкент қаласында бүгінде 32 мыңнан астам мұғалім еңбек етеді. Олардың арасында:
-
1 педагог – «Қазақстанның Еңбек Ері» атағына ие болса,
-
4 ұстаз – «Қазақстанның еңбек сіңірген ұстазы» құрметті атағына,
-
тағы 4 педагог – «Ерен еңбегі үшін» медаліне ие болған.
Бұл көрсеткіш – шымкенттік ұстаздардың кәсіби деңгейінің жоғары екенін және олардың еңбегі ел көлемінде мойындалғанын дәлелдейді. Қаланың білім беру саласы жыл сайын қарқынды дамып, жаңа мектептер мен балабақшалар салынуда, ал мұғалімдерге арналған заманауи курстар мен оқыту бағдарламалары жүйелі түрде ұйымдастырылуда.
Салтанатты жиында сөз сөйлеген ардагер ұстаздар мен жас педагогтер де өздерінің толғанысқа толы пікірлерімен бөлісіп, ұстаздық жолдың жауапкершілігі мен абыройы туралы ойларын айтты.
Іс-шара соңында қала әкімі Ғабит Сыздықбеков барша ұстаздарға қажырлы еңбегі мен мамандығына деген адалдығы үшін алғыс білдіріп, зор денсаулық, отбасылық амандық пен шығармашылық табыс тіледі. Шымкенттегі бұл мереке ұстаздарға деген халықтың ыстық ықыласы мен шынайы құрметін тағы бір мәрте дәлелдеді.
