Шымкент қаласында Қазақстан кәсіподақ қозғалысының 120 жылдығы мен Кәсіподақтар федерациясының 35 жылдығына арналған «Кәсіподақ RUN 2025» атты бұқаралық жүгіру жарысы өтті. «Келешекке бірге жүгіреміз!» ұранымен ұйымдастырылған шара қаладағы спорт пен қоғамдық бірліктің мерекесіне айналды.
Жарысқа 500-ден астам кәсіподақ мүшесі қатысты, олардың жартысына жуығы «Қызмет» салалық кәсіподағының Шымкент қалалық филиалынан болды. Қатысушылардың мақсаты – спорттық рухты, салауатты өмір салтын және еңбек адамының бірлігін дәріптеу.
Іс-шараның салтанатты ашылуында Шымкент қаласы кәсіподақтар орталығының төрағасы Бауыржан Әлтеев сөз сөйлеп, қатысушыларды ынтымақ пен денсаулықтың мерекесімен құттықтады. Ол «Келешекке бірге жүгіреміз!» ұранының мәнін ашып, бұл бастама елдің еңбек адамдары арасындағы бірліктің көрінісі екенін атап өтті.
Жарысқа қала мен облыстың түрлі салалық кәсіподақ ұйымдары қатысты. Олардың қатарында «Қызмет», «SENIM», мәдениет және спорт саласының кәсіподақтары, білім және ғылым қызметкерлерінің ұйымдары, сондай-ақ құрылыс және тұрғын үй-коммуналдық шаруашылық саласының өкілдері бар. Бұл қатысушылардың әр сала еңбеккерлерін біріктіріп, кәсіподақ қозғалысының кең ауқымын көрсетті.
Жүгіріс барысында достық, өзара қолдау және салауатты бәсекелестік рухы сезілді. Әр қатысушы үшін бұл тек жарыс емес, ортақ мақсатқа жұмылған еңбектің, табандылықтың және рух мықтылығының белгісі болды.
Ерлер арасындағы 5 шақырымдық қашықтықта «Қызмет» салалық кәсіподағының Шымкент қалалық филиалының өкілдері Марат Байтуғанов пен Артур Ниязов жеңімпаз атанды. Ал әйелдер арасындағы 1,6 шақырымдық жарыста №21 мектептің мұғалімі Ниғара Хасанова бірінші орынды иеленді. Денсаулық сақтау саласының өкілі Гүлайша Бекеева екінші орынға, ал №10 мектеп мұғалімі үшінші орынға ие болды.
Барлық жеңімпаздарға ҚР Кәсіподақтар федерациясы төрағасы Сатыбалды Дәулеталиннің қолы қойылған дипломдар және бағалы сыйлықтар табысталды. Бас жүлде — Манкент шипажайына 10 күндік демалыс жолдамасы — Байдәулетова Айгерім Серікқызына бұйырды.
Жарыстың ерекшелігі – қатысушылардың барлығы өз еңбегімен, спортқа деген сүйіспеншілігімен ел бірлігінің айғағы бола алды. «Кәсіподақ RUN 2025» шарасы еңбек адамдарының тек кәсіби салада ғана емес, рухани және дене шынықтыру бағытында да белсенді екенін көрсетті.
Бұл бастама Шымкент қаласындағы еңбек ұжымдары арасындағы достық пен ынтымақты нығайтуға, сондай-ақ салауатты өмір салтын насихаттауға бағытталған. «Кәсіподақ RUN 2025» жүгіруі келешекте де дәстүрге айналып, ел бірлігі мен еңбектің құндылығын дәріптейтін игі шара ретінде жалғасын табары сөзсіз.
