Шымкент қаласы соңғы жылдары еліміздің ең қарқынды дамып келе жатқан өңірлерінің біріне айналды. Қала экономикасына тартылған инвестициялар көлемінің тұрақты артуы еңбек нарығында да оң өзгерістерге жол ашып отыр. 2025 жылдың қаңтар–тамыз айларында негізгі капиталға салынған инвестициялар 458 494 млн теңгені құрап, өткен жылдың сәйкес кезеңімен салыстырғанда 109,5%-ға артты. Бұл – қаланың іскерлік белсенділігінің жоғарылағанын және жаңа өндірістік жобалардың іске қосылып жатқанын айқын көрсетеді.
Инвестиция көлемінің артуы ең алдымен жаңа кәсіпорындардың ашылуына ықпал етуде. 2025 жылдың 1 қыркүйегіне дейін Шымкентте тіркелген заңды тұлғалар саны 29 776 бірлікке жетті. Бұл көрсеткіш өткен жылмен салыстырғанда 2,3%-ға өскенін білдіреді. Әсіресе 100 адамнан аз қызметкері бар шағын кәсіпорындардың саны 29 335 бірлікке көбейген. Шағын және орта бизнес – қала экономикасының тірегі. Олардың көбеюі жаңа жұмыс орындарының ашылуына және тұрғындардың табысының артуына ықпал етеді.
Жұмыс істеп тұрған заңды тұлғалардың саны да айтарлықтай. Қалада ресми түрде қызметін жалғастырып жатқан кәсіпорындар саны 24 058 бірлікті құрады, оның ішінде 23 627-сі – шағын кәсіпорындар. Бұл деректер Шымкенттің бизнес-ортасы барған сайын тартымды болып келе жатқанын көрсетеді. Әрбір ашылған шағын кәсіпорын – кемінде бірнеше жаңа жұмыс орны деген сөз. Демек, тұрғындардың тұрақты жұмыспен қамтылу мүмкіндігі артып келеді.
Қаланың еңбек нарығына оң ықпал етіп отырған тағы бір маңызды көрсеткіш – шағын және орта кәсіпкерлік субъектілерінің өсуі. 2025 жылдың басынан бері олардың саны 27 378 бірлікке жетіп, 2,4%-ға артты. Бұл – тұрғындардың кәсіпкерлікке деген қызығушылығы артып, өзін-өзі жұмыспен қамту мүмкіндіктерін белсенді пайдаланып отырғанын дәлелдейді. Мұндай үрдіс бір жағынан еңбек нарығындағы жүктемені азайтса, екінші жағынан халықтың табысын арттыруға тікелей әсер етеді.
Шымкент қаласында кәсіпкерлікке көрсетіліп отырған мемлекеттік қолдаудың нәтижесінде жаңа өндіріс орындары ашылып, жастар мен әлеуметтік осал топтарға да еңбекке араласу мүмкіндігі ұсынылуда. Индустриалды аймақтарда іске қосылған жобалар мен өндірістік кәсіпорындар жергілікті халықты жұмыспен қамтып қана қоймай, кәсіби дағдыларын жетілдіруге де жол ашады. Бұл – экономикалық тұрақтылықтың және еңбек нарығының дамуының негізгі кепілі.
Алдағы жылдары да бұл бағыттағы жұмыстар жалғасатыны белгілі. Жоспарланған инвестициялық жобалар іске асқан сайын қалада жаңа жұмыс орындары ашылып, тұрғындардың әлеуметтік жағдайы жақсара бермек. Кәсіпкерліктің дамуы – тек экономикалық көрсеткіштердің артуы ғана емес, ол ең алдымен тұрғындардың өмір сапасын жақсартуға, жастардың мамандық игеруіне және еңбекке араласуына үлкен серпін береді.
Осылайша, Шымкент қаласында инвестициялар көлемінің артуы мен кәсіпкерліктің кеңеюі еңбек нарығының тұрақтылығын қамтамасыз етіп, тұрғындардың жұмыспен қамтылуына зор мүмкіндік туғызып отыр. Бұл үрдіс жалғасын тапса, мегаполис еліміздегі ең ірі өндірістік және кәсіпкерлік орталықтардың біріне айналары сөзсіз.
