2025 жылдың ІІ тоқсанында Шымкент қаласында жұмыссыздар саны 22,5 мың адамды құрады. Бұл көрсеткіш жалпы жұмыс күшінің 4,7 пайызына тең. Қазақстанның ірі мегаполистерінің бірі саналатын Шымкентте халық саны жыл сайын артып келе жатқандықтан, еңбек нарығындағы өзгерістерді қадағалау аса маңызды. Ресми статистикаға сәйкес, 1 қыркүйек жағдайында жұмыспен қамту органдарына тіркелген жұмыссыздардың саны 12 437 адамды құрады, бұл жалпы жұмыс күшінің 2,6 пайызына тең. Бұл Шымкент қаласында ресми тіркелген жұмыссыздар үлесінің салыстырмалы түрде төмен деңгейде екенін айғақтайды.
Жалпы алғанда, еңбек нарығындағы ахуал тұрақты сипатқа ие. Қалада әр апта сайын бос жұмыс орындары жәрмеңкелері өткізіліп, онда ондаған жұмыс беруші тұрғындарға түрлі мамандықтар бойынша тұрақты және уақытша бос орындар ұсынады. Мұндай шаралар азаматтардың еңбекке орналасу мүмкіндіктерін кеңейтеді және ресми жұмыссыздық деңгейін төмендетуге ықпал етеді.
Шымкентте жастарға ерекше назар аударылады. «Жастар практикасы» жобасы арқылы оқуын енді аяқтаған түлектер өз мамандықтары бойынша алғашқы тәжірибелерін жинақтауда. Сонымен қатар, «Алғашқы жұмыс орны» жобасы да жастардың еңбек жолын бастауына жол ашып отыр. Бұл бастамалар жас буынның еңбек нарығына тезірек бейімделуіне мүмкіндік береді.
Әлеуметтік осал топтарға қолдау көрсету де маңызды бағыттардың бірі болып табылады. Пробация қызметінде тұрған азаматтар, мүмкіндігі шектеулі адамдар және көпбалалы отбасыларға арнайы квоталар белгіленіп, олар тұрақты жұмысқа орналасуға мүмкіндік алуда. Осындай кешенді шаралар Шымкент қаласының еңбек нарығын жандандырып, тұрғындардың әлеуметтік тұрақтылығын қамтамасыз етеді.
Жұмыссыздық деңгейінің төмендігі — қаланың экономикалық белсенділігінің, кәсіпкерлік пен өндіріс саласының дамуының көрінісі. Жаңа өндіріс орындарының іске қосылуы, шағын және орта бизнестің кеңеюі тұрғындарға қосымша жұмыс орындарын ұсынып отыр. Мемлекет тарапынан іске асырылып жатқан бағдарламалар да қаладағы еңбек нарығының тұрақты дамуына қолдау көрсетуде.
Осылайша, Шымкент қаласындағы жұмыссыздық көрсеткіштері елдің орташа деңгейімен салыстырғанда айтарлықтай қолайлы қалыптасып отыр. Бұл қаланың әлеуметтік-экономикалық дамуы мен еңбек нарығындағы мүмкіндіктердің кеңейіп келе жатқанын көрсетеді.
