Теміржол – ел экономикасының күретамыры, ал бұл саладағы тәртіп пен жүйелілік – темірдей тәртіпке бағынышты. Осындай маңызды бағыттың тыныс-тіршілігін қамтамасыз етіп отырған жандардың бірі – Құрманәлі Шәкір Шымкентбайұлы. Ол теміржол саласына 29 жылдық саналы ғұмырын арнап, кәсіби біліктілігі мен адалдығы арқылы үлкен беделге ие болған тәжірибелі маман.
Құрманәлі Шәкірұлының еңбек жолы Қазығұрт станциясында пойыз құрастырушысы әрі вагондардың қозғалыс жылдамдығын реттеушісі қызметінен бастау алған. Бұл қызметтер ерекше қырағылықты, нақты есеп пен физикалық төзімділікті талап ететін күрделі міндеттер қатарынан саналады. Себебі бір пойыздың дұрыс жасақталмауы – жолаушылар мен жүктің қауіпсіздігіне тікелей әсер етеді. Осы жауапкершілікті сезіне отырып, Құрманәлі мырза өз жұмысына әрдайым ұқыпты, тиянақты қарады. Ол жылдар бойы еңбек ете жүріп, темір жол қозғалысының тетіктерін терең меңгеріп, өз ісінің нағыз шебері атанды.
Бүгінде ол Текесу станциясында пойыз құрастырушысы ретінде қызметін жалғастыруда. Бұл — теміржол желісінің жұмысын қамтамасыз ететін негізгі буындардың бірі. Пойыздарды дәл уақытында және дұрыс бағытта жасақтау, олардың қауіпсіз қозғалысын қамтамасыз ету – Құрманәлі Шәкірұлының күнделікті атқарып жүрген міндеті. Ұзақ жылғы тәжірибесі мен ішкі тәртібі оның кәсіби табысының басты кепіліне айналды. Ол өз жұмысына адал қарап, ешқашан немқұрайлылық танытпаған. Сондықтан да ұжымдастары арасында үлкен сый-құрметке ие болып, жас мамандарға тәлімгер бола білді.
Құрманәлі мырзаның өмір жолы – еңбекқорлық пен табандылықтың көрінісі. Оның кәсіби шеберлігі мен еңбекке деген адалдығы — болашақ теміржолшылар үшін үлгі боларлықтай. Ол жұмыс орнында ғана емес, жалпы өмірде де жауапкершілік пен тәртіптілікті бірінші орынға қоятын жан. Әріптестері оны еңбекке берілген, сабырлы мінезімен ерекшеленетін іскер азамат ретінде сипаттайды.
Бүгінгі таңда елімізде көлік және логистика саласын дамытуға ерекше көңіл бөлініп отыр. Президент тапсырмаларына сәйкес, темір жол инфрақұрылымын жетілдіру, жаңа логистикалық хабтар құру, ішкі нарық пен экспортқа бағдарланған жүк тасымалын арттыру бағытында нақты жұмыстар қолға алынуда. Бұл мақсаттардың жүзеге асуына Құрманәлі Шәкірұлы сынды тәжірибелі мамандардың қосар үлесі орасан.
Қызметіне адал, кәсібіне жан-тәнімен берілген Құрманәлі мырза – теміржол саласының алтын тірегіне айналған азаматтардың бірі. Осындай еңбек майталмандарының арқасында еліміздің көлік жүйесі сенімді жұмыс істеп, халықтың қажеттілігін уақытылы қамтамасыз етіп келеді.
