Қызылорда қаласында Халықаралық жастар күніне орай ұйымдастырылған «ЖАСТАРМЕН БІРГЕ!» атты ашық аспан астындағы ерекше форматтағы жастар кеші жастар мен қала қонақтарына көтеріңкі көңіл-күй сыйлады. “Достық үйі” ғимаратының алдында өткен бұл гала-концерт жастардың шығармашылығын қолдау мен олардың бос уақытын тиімді өткізуге бағытталған маңызды шара болды.
Кешке қала жастары, еріктілер, өнерсүйер қауым және облыс қонақтары қатысты. Олар жергілікті жас өнерпаздардың өнерін тамашалап, әсем музыка мен жарқын эмоцияға толы кештің куәсі болды. Бұл кеш жастардың бірлігін, шығармашылық әлеуетін және өмірге деген құлшынысын көрсететін алаңға айналды.
Қызылорда облысы әкімінің орынбасары Мейрамбек Шермағанбет жастарды мерекемен құттықтап, олардың ел болашағындағы маңызды рөлін атап өтті. «Жастар – қашанда асқақ арман мен үміт, биік ар мен өр намыстың символы. Қай елдің болмасын басты капиталы халқы десек, соның ішінде жастар – қоғамның жетекші күші», – деп атап өтті ол өз сөзінде.
Мәдени бағдарлама барысында көрермендер Жарасхан Төлебай, DJ Jako, Axallek, Есқара, Бекзат Молдабергенов сынды жастардың өнерін тамашалады. Шара жүргізушілері Әліби Басаров пен Нұрлан Сипанов көрерменмен белсенді байланыс орнатып, кешті әсерлі ете түсті. Кештің басты хедлайнері ретінде өнер көрсеткен “6ELLUCCI” тобы сахнада жарқын шоу ұйымдастырып, кеш шарықтау шегіне жетті.
Айта кету керек, бұл концерттің басты ерекшелігі – сахнаға шыққан барлық өнерпаздардың жергілікті жастар болуы. Олардың арасында Сыр өңірінен шығып, бүкіл елге танылған таланттар да бар. Бұл өз кезегінде жастарға шабыт сыйлап, шығармашылыққа деген сенімді арттырды.
Кеш соңында DJ Jako-ның сүйемелдеуімен өткен би кеші шараның көркін қыздырып, қатысушыларға ұмытылмас сәттер сыйлады. Осындай игі бастамалар жастар арасында мәдени белсенділікті арттырып, олардың әлеуетін жаңа деңгейге көтеруге ықпал етеді.
