Мақтаарал ауданында «Таза Қазақстан» бағдарламасы аясында жүзеге асып жатқан жұмыстар нақты нәтижесін беруде. Атап айтқанда, ауданның коммуналдық саласына қажетті жаңа техникалар сатып алынып, қазіргі таңда алғашқы легі пайдалануға берілді. Бұл бастама аудан аумағында экологиялық ахуалды жақсартуға, санитарлық тазалықты жүйелеуге және халықтың өмір сапасын арттыруға бағытталған маңызды қадам болып отыр.
Бағдарлама аясында Түркістан облысы әкімінің тапсырмасына сәйкес, облыстық бюджет есебінен 239,15 миллион теңге көлемінде қаржы бөлінген. Бұл қаражатқа арнайы жабдықталған 11 трактор, 11 тіркеме, 3 жүк тиегіш, 11 трицикл және 1 автогидроподъемник техникасын сатып алу жоспарланған. Мұндай техникалардың жеткізілуі аудандағы санитарлық тазалық жұмыстарын айтарлықтай жеңілдетіп, тұрмыстық қатты қалдықтарды жинау және шығару ісінде үлкен тиімділік береді деп күтілуде.
Қазіргі уақытта Мақтааралға жеткізілген алғашқы партия – 11 трактор, 11 тіркеме және 3 погрузчик – арнайы салтанатты шара аясында коммуналдық сала қызметкерлеріне ресми түрде табысталды. Іс-шара барысында аудан әкімі Бақыт Асанов техникалардың кілттерін жүргізушілерге өз қолымен тапсырып, олардың еңбегіне табыс тіледі. Жаңа техникалар аудан тұрғындарының игілігі үшін жұмыс істеп, ауыл-аймақтың тазалығы мен экологиялық жағдайының жақсаруына өз үлесін қосатынына сенім білдірілді.
Жергілікті тұрғындар бұл бастаманы жылы қабылдап, өз алғыстарын білдіруде. Себебі бұрын ескі әрі аз техниканың салдарынан кейбір елді мекендерде қоқыс уақтылы шығарылмай, экологиялық мәселелер туындап отырған еді. Ендігі жерде бұл проблемалар кезең-кезеңімен шешімін табады деп күтілуде. Атап айтқанда, жаңа техникалар арқылы қоқыс жиналатын орындар жүйелі түрде тазаланып, аудан келбеті бұрынғыдан да көрікті болмақ.
Бұл шара тек техникалық жабдықтаумен шектелмей, тұрғындардың экологиялық мәдениетін арттыруға да оң ықпалын тигізеді. Қоршаған ортаны қорғау – барша халықтың ортақ міндеті. Ал әкімдік пен коммуналдық қызметтердің бірлескен жұмысы осы міндетті тиімді жүзеге асыруға бағытталған. Аудан әкімдігі тұрғындарды белсенді қатысуға шақырып, тазалық пен тәртіптің әрбір азаматтан басталатынын ұдайы ескертіп келеді.
Коммуналдық сала өкілдері үшін бұл жаңа техникалар еңбек өнімділігін арттыруға сеп болады. Бұрын қолмен немесе ескі техникамен атқарылатын жұмыстар енді заманауи құралдар арқылы жылдамырақ әрі сапалы орындалмақ. Бұл өз кезегінде қызметкерлердің жұмыс істеу жағдайын жақсартып, аудандағы өмір сапасына тікелей әсер етеді. Сонымен қатар, мұндай игі бастамалар арқылы жастарды еңбекке баулу, қоғамға пайдалы іске жұмылдыру мүмкіндігі де арта түседі.
Алдағы уақытта Мақтаарал ауданында тазалық мәдениетін одан әрі дамытуға бағытталған жұмыстар жалғасын табады. Әкімдік тарапынан арнайы жоспар әзірленіп, ауылдық округтерде қосымша түсіндіру және үгіт-насихат жұмыстары жүргізілуде. Сонымен қатар, әр ауылда сенбіліктер өткізу, экологиялық акцияларға еріктілерді тарту арқылы экологиялық сана қалыптастыру көзделіп отыр.
Жаңа техникалармен жабдықтау бастамасы Мақтаарал ауданының даму бағытын айқындайтын маңызды оқиға болды. Мұндай нақты істердің арқасында тұрғындардың билікке деген сенімі артып, өзара ынтымақтастық нығая түседі. Өңірдің көркейіп, халықтың тұрмыс деңгейі жақсаруына бағытталған бұл қадам алдағы уақытта өз жемісін берері сөзсіз. Ең бастысы – атқарылып жатқан жұмыстардың тұрақты жалғасын табуы мен халықтың белсенді қолдауы. Жергілікті билік осы бағытта жүйелі жұмыс атқаруға ниетті.
