Осы орайда балалар қауіпсіздігі полиция органдарының қатаң бақылауына алынды. Жаңа оқу жылының басталуына байланысты бұл мәселеге ерекше назар аударылып отыр.
«Халық арасында жүргізіліп жатқан үгіт-насихат жұмыстарына қарамастан, балалар қауіпсіздігіне қауіп төндіретін жол апаттары азаймай тұр. Өкінішке қарай, жеті айда жол апаттарында 176 бала қаза болды. Бұл – орны толмас шығындар. Біздің қолымыздағы ең қымбат бағалы дүние – балалардың өмірін сақтап қалу үшін қолдан келгенше аянбауымыз керек. Зардап шеккен балалардың жартысынан көбісі жолаушы ретінде қайтыс болған. Қалғандары – жаяу жүргіншілер, соның ішінде велосипедші, самокатшы немесе мопед жүргізгендер. Көп жағдайда қаза болған балалар ересектер тарапынан тасымалдау кезінде көлік ішінде балаға арналған қауіпсіздік құрылғыларын немесе қауіпсіздік белдіктерін қолданбайды», – деді спикер.
Тағы бір маңызды жол жүрісіне қатысушысы – жаяу жүргінші бала. Жолдағы қауіпсіздік жаяу жүргіншілер мен жүргізушілердің жауапкершілігіне байланысты. Бірақ жол апатында көбіне жаяу жүргіші балалардың өздері кінәлі болып жатады, ал ең өкініштісі жолды кез келген жерден немесе бағдаршамның қызыл түсіне өтіп кету оқиғаларының жиі кезігуі. Кейбір балалар жолдан өтерде жан-жағына қарау керек екенін ұмытып кетеді. Ал қараңғы кезде, әсіресе, ымырт түскенде жүргізушілер жаяу жүргіншілерді байқамай қалуы мүмкін, өйткені олар киім кигенде жарық шағылыстыратын элементтерді қолданбайды.
Кәмелетке толмағандардың кінәсінен болған жол апаттарында 17 бала қайтыс болып, 200-ден астамы түрлі дене жарақатын алған. Жаяу жүргінші балалардың қатысуымен болатын жол апаттарының негізгі себептері: жолды кез келген жерден өту, бағдаршамның қызыл түсіне өтіп кету және жақындап қалған көліктің алдынан жүгіріп шығу. Ішкі істер министрлігі өз кезегінде балалардың жол-көлік жарақатын азайту үшін шаралар қабылдайды. Құқықтық ағарту, балалардың жол-көлік жарақатының алдын алу және үгіт-насихат жұмыстары тұрақты түрде жүргізілуде.
