Еліміздің өндірістік әлеуетін арттыруда мыңдаған еңбек адамының маңдай тері мен табанды қызметі жатыр. Солардың бірі – электротехника саласында өзіндік орны бар, кәсібіне адал, тәжірибесімен танылған Сәрсенбаев Ерболат. Қызылорда облысының Жаңақорған ауданында дүниеге келген ол қарапайым ауыл мектебінен білім алып, кейін Жаңақорған аграрлық-техникалық колледжінде «Агроном» мамандығын меңгергенімен, өмір жолын өндіріс саласымен байланыстырды.
2006 жылы Кентау трансформатор зауытында еңбек жолын бастаған жас маманның кәсіби шеберлігі мен еңбекқорлығы аз уақыт ішінде таныла бастады. Өз ісіне деген жанашырлық пен жоғары жауапкершілік нәтижесінде 2010 жылы «Жылдың үздік қызметкері» атанып, кәсіби мансабында алғашқы ірі жетістікке қол жеткізді. Бұл марапат – тек марапат емес, болашақтағы табысты еңбек жолының бастауы болды.
Қазіргі таңда Сәрсенбаев Ерболат – «Asia Trafo» ЖШС-нің зауытында орамдаушы (намотчик) қызметін абыроймен атқарып келеді. Ол еңбек еткен жылдары көптеген маңызды жобаларға қатысып, кәсіпорынның өндірістік қуатын арттыруға елеулі үлес қосты. Жоғары еңбек мәдениеті мен мамандығына деген адалдығы – оның басты ерекшелігі. Ерболат өз жұмысында ұқыптылықты, дәлдікті және тәртіпті басты қағида етіп ұстанады. Бұл қасиеттері оны ұжымда сыйлы әрі сенімді маман ретінде танытты.
Сонымен қатар ол өндіріс процесін жетілдіруге бағытталған бірнеше бастаманың авторы болды. Оның енгізген ұсыныстарының бірі зауыттағы еңбек өнімділігін 25 пайызға арттыруға мүмкіндік берді. Бұл – тек техникалық шешім ғана емес, кәсіби көзқарастың, терең талдаудың нәтижесі. Мұндай жетістік оның білікті маман ғана емес, жаңашыл қызметкер екенін де дәлелдейді.
Сәрсенбаев Ерболат – көпбалалы отбасының тірегі. Төрт ұл мен екі қыздың әкесі бола жүріп, қызметін де, отбасын да елеулі жетістіктерге жеткізіп келеді. Оның отбасына деген қамқорлығы мен қызметіне деген адалдығы – жас ұрпаққа үлгі боларлық өмірлік ұстанымның көрінісі.
Оның еңбек жолы – кәсібіне берілген, тәртіп пен жауапкершілікті өмірлік ұстаным еткен маманның өмірінен сыр шертеді. Осындай тұлғалар елдің өндірістік негізін бекемдеп, болашақ ұрпаққа еңбектің қадірін үйретіп келеді.
